1Hanat mun'am'amlong ta'u ya olton ta'un mangikankanta hi pundayaw ta'un Apu Dios te hiyay mangipappapto' i dita'un tinanud Israel.

2Mungkanta ta'u an unnudan ta'uh nadan tamburin ya impagangoh ta'u nan harp ya lira.

3Ya impagangoh ta'u nan trampeta hinan ngilin di nakayangan nan bulan ya hinan ongal di bulan.

4Te hiyah naey intugun nan Dios an dinayaw handin ammod ta'un hi Jacob hi mahapul an unudon ta'un tinanudana.

5Imbaganah tuwe i handidan a'ammod ta'u an tinanud Israel hidin nundusaanah nadan i Egypt.

Ya i diyey nangngolanda i han munhapit an adida ma'awatan di pinhodnan ibaga

6te alyonay, Inaan'u nan paddungnay madamot an pinahonyu.

Te pinogpog'u nadan naligat an tamuyu.

7Te hidin maligligatan ayu ya numpahpahmo' ayun ha"on ya wahdiya' an nahawanana' hinan bugut ot ihwang da'yu.

Mu pinatna' di anahamad di pundinolyun ha"on hidin wa'ayuh nan obob an nungngadan hi Meribah hidin ma''id ha inumonyu.

8Ot da'yun tinanud Israel an imbilang'uh tatagu' ya daan mot tugunon da'yu'e tuwalin ha"on ya igongahanyu.

9Ta adi ayu mundayaw hinadan dios an dayawon di tataguh udum hi boble.

10Te ha''on nan Dios an ap'apuyu an nangipangulun da'yu hi nalpuwanyuh ad Egypt.

Ot hi'on iyohhayuy pangun'unudyun ha"on ya idat'un namin di mahapulyu.

11Mu ma"id te da'yun tinanud Israel an imbilang'uh tatagu' ya adiyu donglon ya adiyu unudon di ibaga'.

12Ta hiya mo nan inwalong da'yu ta ukod ayuh at'attonyu.

13Te onha donglonyu ya unudonyu nan ibaga'

14ya ongal di abalina' ot undan mahan naligat hi pangabaka' hinadan binuhulyu.

15Hanadan humihiwon ha"on ya lo'tat ya mundu"undan ha"on te ma"id ha pogpog nan pundusa' i dida.

16Mu da'yu'en imbilang'uh tatagu' ya idattan da'yuh mun'a'aphod an makan ya dakol an danum di iyukan.