1Tanganu nin anu on numanomnom nadan bokon Judyu ta ngohayondah Apu Dios an ta'on on ma"id ha abalinanda.

2Ta pamaag ya mun'oh'ohha nadan ap'apu an umat hinadan patul ta mi'buhuldah nan pinto'mun Ap'apu.

3Ta alyonday, Pogpogon ta'uy nihbutan ta'u i dida ta ukod ta'uh aton ta'u.

4Mu hi Apu Dios hi ad abunyan ya ngihngihilana dida i diyen ninomnomdan aton.

5Ta gapuh bungotna ya ahina pun'ihingal dida ta ahi mohpe nunhiglay takutda.

6Ya hidih nan nabillid an niyappit i hiya an ma'alih ad Zion* ya wahdiy pinto'na tuwali an Patul.

7Ot alyon diyen pinto' Apu Dios an Patul di, Pinhod'un ipa'innila nan impa'innilan Apu Dios i ha"on an alyonay, Ipa'innila' i he"a hi ad uwani an he"a nan Imbabale' ya ha"on hi Amam.

8Ot onha dawato' an idatnan ha"on di abobboble ya an namin nadan wahtun luta ot atona.

9Ya idatnay abalina' an mun'ap'apu ta abalina' an manadag hinadan tatagu ta umatdah nan nipuhit an buhi an mahilhilit.

10Ta hiya nan da'yun patul ya hanat hanadan maphod di atonyu ta atiganan nala'ing ayu.

Ya da'yun a'ap'apu ya hanat donglonyu tudan mibagan da'yu ta pun'adalanyu.

11Ta mawaday takutyu an adi mangunud i Apu Dios.

Ta hiyay dayawonyu ya punhilbiyanyu.

12Ya hanat mumpada''ul ayu ta hiya nimpey dayawonyu.

Te adiyu'e ya alina ya bimmungot an gapuh nadan at'attonyu ya pamaag ya pinogpognay nitaguwanyu.

Ot mipa'amlong nadan mundinol i Apu Dios te hiyay mangipapto' i dida.