1Apu Dios, donglom bahan tun dasal'u ta ihwanga' hinadan binuhul'u.

2Ta adim iyabulut an ma'at i ha"on nan ninomnom nadan adi maphod di pangatdan aton i ha"on.

3Te matadom di panapitda an umat hinadan ispada onu pana.

4Ya ta'on on ma"id ha bahul nan ohan tagu ya ma"id ha takutdan e manumtumbu' i hiya an ta'on on bokon immannung ta pa"ihonday nitaguwana.

5Ya munhimboboddangda ta ma'at nan adi maphod an nunhahappitanandan aton.

Ya alyonda bo udot di ta'on anuh onda atonhidi ot undan waha nanginnila i diyen at'attonda.

6Ta nagibbuh'en hinahapitda on alyonday,

Immannung an nala'ing ta'u te maphod hituwen nunhahapitan ta'u.

Ya immannung an nunhiglay abalinan nadan tatagun munnomnom hi adi maphod hi atonda.

7Mu palpaliwanda ya panaon Apu Dios dida ta mun'ahugatanda ya mun'a'ateday udum.

8Ta diday a'atan nadan hinannapitda ta diday madadag.

Ta hanada'en manigon dida ya munwigwigiwigda on nginihngihilanda dida.

9Ta i diyen ma'at ya malmu mohpey takut di tatagu.

Te masda'awda i diyen aton Apu Dios ya eda mohpe ibanagbaggah diyen inatna.

10Mu hanadan mangun'unud i Apu Dios ya mundinoldan hiya.

Ya diday mun'am'amlong an mundayaw i hiya.