1Da'yun i'iba, hanat igongahanyu tudan ituddu' i da'yu.

2Te ipa''el'un namin di panuddu' ta wan ma'innilaanyu nadan agge nipa'innilah din kanaman.

3Datuwe ya dingngol ta'u tuwali i handidan a'ammod ta'uh din nadne.

4Ot hanat ipa'innila ta'u pibo datuwe hinadan i'imbabale ta'u ta wan ma'innilaanda nan ongal an abalinan Apu Dios ta wan ta'on on dida ya hiyay dayawonda.

5Hi Apu Dios ya impa'innilana nadan tuguna i handidan a'ammod ta'u an holag Jacob an nunhituh ad Israel.

Ot ibaganan dida an mahapul an itudduda damdama datuwe hinadan tanudanda

6ta wan innilaonda.

Ta hiya bo damdamay intuddudah nadan tanudanda.

7Ta wan hi Apu Dios di pundinolanda ya un'unudonda nadan tuguna ya ta wan adida linglingon nadan milagro an ina'inat Apu Dios.

8Ta adida iyunnudan i handidan a'ammod ta'u an nginhedah Apu Dios ta aggeda inunud nadan tuguna ya bokon hiyay nundinolanda.

9Ta umatdah didan tindalun nadan tinanud Epraim an manu te napongdah pana mu hidin nadatngan di gubat ya binumtikda.

10Athidiy na'at i handidan a'ammod ta'u te imbahhoda nan imbagan Apu Dios hi atonda te aggeda inunud nadan tuguna.

11Ya lininglingda nadan ina'inatnan milagro an iphodanda

12an umat hinan inatna hi ad Soan an ohan bobleh ad Egypt an nunhintiggan handidan a'ammod ta'u

13an nunhi''anona nan liting hinan baybay ta nangi'wan handidan a'ammod ta'un immagwat.

14Ya hidin dimmanallanananda ya wada han bugut an nangipangpangulun dida ya wa'et nahdom ya mumbalin hidiyeh apuy ta patalana nan awonda.

15Ya dinoltakna nan doplah ta bimmudduh di liting ta waday ininumdahdih nan agge naboblayan.

16Ya hidiyen liting an nalpuh nan doplah ya umat hi dinakol di liting hinan wa''el.

17Mu ta'on on athidi ya ondaot inyal'alan nginhe nan na'abbaktun Dios hidih nan agge naboblayan.

18Ya inattadan pinanatnah Apu Dios hi'on abalinanan mangidat hinadan pinhoddan anon.

19Ta adi ahan maphod di nangalidan hiya an alyonday,

On abalinana nin an mamangan i dita'uh tun agge naboblayan?

20Manu te dinoltakna nan doplah ot tumuluy liting an ay wa''el.

Mu undan nin abalinanan mangdat i dita'u hi makan an umat hi tinapay ya dotag.

21Ta hidin dingngol Apu Dios hidiyen inalida ya nunhiglay bungotna i handidan a'ammod ta'un tinanud Israel.

22Te ma"id ha dinoldan hiya ta hiya nan adida patiyon an abalinan Apu Dios an mangihwang i dida.

23Mu ta'on on athidi ya imbagana damdamah ad abunyan ta paddungnay niluwat

24ot mun'a'agah an ay udan di mana an nalpuh ad abunyan

25ta dakkodakkol di mana hi indatnan anonda an datuwe nan anon di anghel Apu Dios.

26Ya gapuh nan ongal an abalinana ya impa'alina nan tuyup ot ipa'enah awadanda

27ta nadlunday hamutihdih nan awadanda an umatdah panag an immapnal hinan pingngit di baybay.

28Te numpungkohopdah nunlini"odan nadan nun'allunganda.

29Ta indatna nadan pohdon ahan nadan tatagun anon ta nun'a'anda ta ingganah nun'a'apnekda.

30Mu hidin nanongnan nun'akamelanda

31ya impatigon Apu Dios di bungotnan dida.

Ta numpatena nadan mumpangilog an linala'in mun'abikah an tinanud Israel.

32Mu ta'on hi athidiy na'at ya inyal'alan nadan nabatin numbahul.

Ya ta'on on dakol di milagron inat Apu Dios ya adida patiyon an hiyay nangat i datuwe.

33Ta hiya mo nan pininghan Apu Dios an pinate dida ta atatakut hidiyen inatnan dida.

34Ta wa'et waday athidih inat Apu Dios i dida on nuntutuyuda mohpe nadan nabati hi numbahulanda ya dumasadasalda mohpen hiya.

35Ya nomnomnomda mohpe an hiya nan na'abbaktun Dios an paddungnay ihi"uganda ya hiyay mangihwang i dida.

36Mu aggahda damdama te onda ilaylayahhan hi Apu Dios

37te aggeda inyohhan hiyay pundinolda ya imbahhoda nadan imbaganah atonda.

38Mu ta'on boh on athidi ya himmo'na dida ta pinakawanay bahulda ta aggena dinadag didan namin.

Ya numpi'atnay nangipabungotanda i hiya mu ona on inukmun di bungotnan dida.

39Te innilanan taguda ya abuh an umatdah nan tuyup an nala''uh'e ya ma"id mo.

40Mu numpidakol di nungngohayandan Apu Dios ta hiyah diye nan mahkit di nomnomnan dida hidin awadandah nan agge naboblayan.

41Ta agaggaon pinatnada nan ulen Apu Dios an dayawon ta'un tinanud Israel.

42Adida nomnomon an hiya ya ongal di abalinana ya ta'on on hay nangihwanganan dida hinadan namalpaligat i dida ya adida nomnomon

43an ta'on on dakol di tinigodah inatnan milagro hi awadandah ad Soan hidih ad Egypt.

44Ta numbalinona nadan liting hinadan wangwang ya wa"el hi dala ta adi mabalin hi inumon nadan i Egypt.

45Ya impa'alinay dakkodakkol an lalog ya bakbak ta immalinhawangda ta maligatan nadan i Egypt.

46Ya impa'ana bon namin di intanomda hinadan dakkodakkol an dudun.

47Ya impa'alinay dakkodakkol an dalallu ta nun'a'ate nadan intanomdan greyp ya fig.

48Ya ta'on on hanadan baka ya kalneroda ya nun'a'atedah nangat di dalallu ya kilat.

49Ya gapuh nan nunhiglan bungotnan dida ya intuda'nay dakkodakkol an pumapaten anghel.

50Ta dakolday nun'a'ate hi nangat han dogoh an pistin di tagu.

51Ta nun'a'atedan namin nadan linala'in panguluwan an imbabalen nadan tinanudan Ham an i Egypt.

52Ot ahi mohpe ikak Apu Dios nadan tataguna an a'ammod ta'u ta tinaynandah ad Egypt ot ipanguluna didah nan agge naboblayan.

53Ot ipappapto'na dida ta malinggopda mu hanada'en binuhuldan namdug i dida ya nun'a'altingdah nan baybay.

54Ot iyena didah nan nun'abillid an boble an niyappit i hiya an ongal di abalinanan Dios te inabakna nadan nunhituhdi.

55Ya impa'aana mo tuwali nadan nunhituhdi ta handidan a'ammod ta'un tinanud Israel di nihukkat an nunhituhdi.

Ta nunggogodwa"anda nadan lutada ya diday nunhituh nadan baleda.

56Mu ta'on on athidiy inatnan dida ya apyanan nginheda nan na'abbaktun Dios an aggeda inunud nadan tuguna.

57Ta umatda i handidan a'ammodda an mungngoheda ta ma"id ha dinol i dida te umatdah nan nayaku an papan di pana.

58Te nangapyadah pundayawanda hinadan umat hi bulul ot dadiyey dayawonda.

Ta hiya nan impabungotdah Apu Dios.

59Ta gapu i diyen inatda ya namingpinghan an inwalong Apu Dios handidan a'ammod ta'un tinanud Israel.

60Ot inganuyna mo bo nan tabernakel an niha"adana ni' hi ad Siloh hidin ni'hituwana i dida.

61Ot iyabulutnan ibtik nadan binuhulda nan Kahun an nittuwan nan Hapitna an mangipatigoh nan ongal an abalinana ya amaphodna.

62Ya gapuh bungotna i handidan a'ammod ta'un tataguna ya nun'ipapatena didah nadan binuhulda.

63Ta nun'a'ate nadan imbabaledan mumpangilog an linala'i ta ma"id ha iyahawan nadan imbabaledan mumpangilog an binabai.

64Ya ta'on on nadan papadi ya ni'impapateda dida mu agge imbaluwan nadan ahawada dida te ta'on on dida ya pinalpaligatda dida.

65Mu lo'tat ya paddungnay inggibo' Apu Dios ta umat i ha immaligwah an nabutong.

66Ot pumpudugna nadan binuhulna ta nun'iwakatda ta nihipun i diye ya nibabaindah inggana.

67Ya bokon mo hidih nan boblen nadan holag Epraim an tinanud Joseph di pinto'nah iha"adana.

68Te ha moy pinto'na ya nan boblen nadan tinanud Judah hidih nan nabillid hi ad Zion an pinpinhodna.

69Ta hidiy nangipata'doganah nan Templo ta umat i ha billid an munnanannong hinan inumbunanah nan lutah inggana.

70Ya pinto'nah apu ta'un hi David hi baalna hidin awadanah nan pumpastolanah kalnero.

71Ot pumbalinonah patul ta hiyay nangipapto' hinadan a'ammod ta'un tinanud Israel.

72Ya nala'ing handin hi apu ta'un hi David te nipto' di inatnan nangipapto' i handidan a'ammod ta'u.