1Dita'un tatagun Apu Dios ya maphod on mun'am'amlong ta'u an ikankanta ta'uy pundayaw ta'un hiya.

Te hidiyey nipto' hi aton nadan mangun'unud i hiya.

2Ot hanat ipagangoh ta'u nadan harp ya lira ta pundayaw ta'u i hiya.

3Ya hanat ip'iphod ta'un mangipagangoh hinadan harp ya lira ya ikankanta ta'u nan balbalu an kanta.

Ya olton ta'un mungkanta an gapuh am'amlong ta'u.

4Te hi Apu Dios ya nipto' an namin di ibagana.

Ya mipatigoh nan pangatna an hiyay nahamad hi pundinolan.

5Ya hay pinhodna ya hanadan nipto' an pangat.

Ta nanongnan mali'nan di tataguh tun luta nan munnananong an pamhodna.

6Ya umman handi tuwali ya ammunay hapitna ot malmuh ad lagud ya an namin nadan dumilag an wahdi.

7Ya hinan baybay di nangi'amunganah nadan liting.

8Ot hanat an namin ta'un tataguh tun luta ya tumakut ta'un adi mangunud i hiya.

Ot maphod on hiyay ipabaktu ta'u ya dayawon ta'u.

9Te ammuna man nimpe nan hapitna ya nalmu tun luta ya an namin an wada ituwen luta.

10Ya abalinanan handiyan ta adi ma'at nadan adi maphod an ninomnom nadan himpamoble an adi umunud i hiya an aton.

11Mu hanada'en pohdonan ma'at ya mipa'annung hinadan mun'atanudan hi inggana.

12Ot hana'en bimmoble an hi Apu Dios an Ap'apu di un'unudonda ya mipa'amlongda te diday pinilinah tataguna an paddungnay odona.

13Te hi Apu Dios an wah ad abunyan ya uh'uhdunganan namin di tataguh tun luta

14an ta'on on wah ad abunyan ya pa'tiggon dita'u nimpen namin an wahtun luta.

15Ya hiyay nangidat hi abalinan ta'un munnomnom ya innilanan namin di at'aton ta'u.

16Hanadan patul ya bokon hay dinakol nadan nun'atutulid an titindalunay pangabakda ya atbohdih nan ohan tindalu an bokon hanan bikahnay mangihwang i hiya.

17Ya adi mabalin hi pundinolan nan mabikah an kabayu hi mangihwang i dita hi gubat.

18Te umman ipapto' Apu Dios nadan mangun'unud i hiya ya mundinol hinan munnananong an pamhodna.

19Ta ihwangna didah ate.

Ya ta'on on waday bitil ya taguwona dida.

20Ot hanat hi Apu Dios ya ammunay pundinolan ta'u hi bumoddang i dita'u ta paddungnay hiyay hapiyo ta'u.

21Ya maphod on mun'am'amlong ta'u ya hiyay pundinolan ta'u te hiya nan nahamad an Dios.

22Ot hanat munnananong nan pamhodmu i da'mi Apu Dios te he"a damdamay nanongnah pundinolanmi.