1Ongal di punhanaanmi i he"a Apu Dios ta hiya nan emi ibanagbagga nan anabaktum ya hanadan nakaskasda'aw an ina'inatmu.

2Inalim di, Waday gina"un'un algo an punhumalyaa' hi atagutagu.

Ya nipto' di ato' an munhumalya.

3Te umat hinan alyog an ta'on on umalyog ta miwagot an namin di wahtun luta mu punnanongo' damdama nan nigopnadan tun luta.

4Ot ibaga' i da'yun adi maphod di pangatna an hanat idinongyun munlattuwag.

5Ya hanat adiyu alyon hi da'yuy ustu te undan nabakbaktu ayu mu ha"on.

6Umman nan munhumalyah tagu ya adi malpuh nan agge naboblayan onu hinan tuluwan di algo onu hinan alimuhan di algo.

7Hi Apu Dios ya ammunay mangibaga hi'on numbahul onu agge numbahul nan ohan tagu.

8Hay bungotna ya nipaddung hinan basu an napnuh na"apgot an bayah an ihiitna ta an namin nadan adi maphod di pangatda ya uminumda i diyen bayah ta ingganah inumondan namin.

9Mu ha''on'e ya inaynayun'u an e ipa'innila nan a'at Apu Dios.

Ya ikankanta' di pundayaw'un hiya an dayawonmin tinanud Israel

10Te alyon Apu Dios di, Pogpogo' di punlattuwagan nadan adi maphod di pangatda.

Mu hanada'en umun'unud i ha"on ya udma' di abalinanda.