1Apu Dios, daan mo bahan ta boddangan da'mi te tuwe mon mun'ama"id nadan mangun'unud i he"a.

Ya ma"id mo ha ta'on hi oha hi mabalin an pundinolan.

2Te munhin'a'ambunda.

Ya manu te maphod di panpannapitda mu dee mannot an aggahda.

3Ot daan mot he''ay mangupup hi to'oda ta way atondan duminong an munlattuwag.

4Te madinolda an gapuh panapitda ya mabalin an alanda nadan gagamgamanda.

Ya hay punnomnomda ya ma"id ha mabalin hi mangipadinong i diyen at'attonda.

5Mu alyon Apu Dios di, Tinigo' di na'na'at hinadan nun'awotwot.

Ya dingngol'uy pumpahmo'an nadan tatagun napaligat hi nangat nadan tatagun adi maphod di pangatda i dida.

Ta hiya nan ad uwani ya ihwang'u dida te hituwey hihimlondah ma'at.

6Mapmaphod hinaen hapit Apu Dios te nan hapitna ya umat i ha namahmah an silber an numpipitun nilutu.

7Ot he''a Apu Dios di dinlonmi hi mangipapto' i da'mi ta mihwang amih inggana hinan pangat nadan tatagun adi maphod di pangatda.

8Te ta'on on idanay umayanmi on dedahdi.

Ya pemanan bo udot di tatagu dadiyen at'attonda.