1Apu Dios, hanat ihwanga' bahan te paddungna tayyay mun'altinga'.

2Ta aya' tayya mun'ilunok hi ad dalom te ma"id ha pangigoppa'a'.

Ot mundatong'e mahan ya ma"id ha bahhonan maltinga'.

3Ya nabaod mahan mo tayyay hapit'u ya namaganan di bagang'un humapihapit.

Ya mahakit mahan mo tayyay mata' an lumuwaluwa an mamannod hi em pamoddangan i ha"on.

4Hanadan humihiwon ha''on an ta'on on ma''id ha bahul'un dida ya indakdakolda mu hay bilang di ibu''u.

Dakol di layah an ipabahuldan ha"on ta pinhoddan pulhon nadan wadan ha"on te alyonday inala' anun dida mu hay immannung ya ma"id ha inala' i dida.

5Ot he"a Apu Dios di nanginnilah nadan pungkapuya' ya ta'on on hanadan numbahula'.

6Mu ta'on on athidi ya adim bahan iyabulut an gapun ha''on ya mibabain nadan ibba' an tinanud Israel an mundinol ya mundayaw i he''a an ongal di abalinanan Dios.

7Gapuh pangun'unuda' i he"a ya nunhigla tayyan pumilangata' hi pama'baindan ha"on.

8Ya namaag mo ahan tayya ya aya' hintaguwan hi pangat tudan i'iba' i ha''on.*

9Pohdo' an maphod di iyatan tun balem ta hiya nan nunhiglan mahkit hi punnomnoma' hi'on kumpulnay iyatana.*

Ta hiya nan an namin nadan pihul di atagutagu i he"a Apu Dios ya madhu i ha"on.

10Ya ta'on on hidin nun'ulata' hi numpada''ula' i he"a ya ona' ot bo pihulon i dida.

11Ya atbohdih din nangilubunga' hi langgut ta pangipatigo' hi puntutuyuwa' hi numbahula' mu ona' ot bo ngihngihilan i dida.

12Ya ha"on di puntumbu' di tinatagu ya ha"on di ikanankantan nadan bumanutobbutong.

13Ot hay dawato' damdaman he''a Apu Dios ya hanat boddangana'.

Ta gapuh nan ongal an pamhodmu ya hanat ihwanga'.

14Ta guyudona' hitun paddungnay nilunoka' ta adiya' bahan umed dalom.

Ta ihwanga' hinadan binuhul'u an paddungnay nangiloblob i ha"on hinan liting ta adiya' bahan malting.

15Ta adim bahan iyabulut an iyanuda' hinan dimmakol an liting onu maltinga' hinan baybay.

Ta adiya' ni' mateh ad uwani.

16Innila' an ongal di pamhodmu ya homo'mun ha"on ot daan mo bahan ta donglom di dasal'u ta boddangngana'.

17Ta adiya' bahan iwalong an baalmu ta tobalom di dasal'u te nunhigla tayyan maligligatana'.

18Ot agam bahan nimpe ta boddangana' ta ihwanga' hinadan binuhul'u.

19Innilam an namin nadan binuhul'u ya innila' ot innilam nadan ina'inatda an nama'bain i ha"on.

20Ta gapuh nan pama'bainandan ha''on ya nunhiglan mahkit di nomnom'u.

Ya hihimlo' ha hummo' i ha''on mu ma''id.

Ya ma''id ni'mo ha umalih mangal'alubyag i ha''on.

21Ya hidin na'agangana' ya han mumpait di indatdah ano'.

Ya hidin na''uwoha' ya han limmanun bayah di indatdah inumo'.

22Ot hanat hinan a'am'amungandan munhahamul ya i diyey adadaganda.*

23Ta mapilokda ya mabakugdah inggana.

24Ta ipatigom di bungotmun dida ta madadagda.

25Ya hanat ma"id ha mabatin dida ta wan mabaoy numpunhituwanda.

26Te deen mamaondan paligaton ya tanumtumbu'on nadan dinusam.*

27Ot hanat adim ibahhon dusaon dida an gapuh nadan dakkodakkol an numbahulanda.

28Ya hanat aanom di ngadanda hinan liblun nitudo'an di ngadan nadan mangun'unud an mi'tagun he"a.

29Mu ha''on'e ya nunhigla tayya tun ligat an holholtapo' ot hanat boddangana' bahan ta ihwanga'.

30Ot ad uwani ya ikanta' di pundayaw'un Apu Dios ya punhanaa' i hiya.

31Ya innila' an hituwen ato' ya umipa'amlong i hiya mu hanan mi'nong i hiya an nahikon an baka.

32Ot tigon'en nadan maligligatan hituwen ato' ya umamlongda.

Ya adina iwalong nadan mumpaboddang i hiya.

33Te hi Apu Dios ya donglonay dasal nadan nun'awotwot ya adi minaynayun an minganuyda.

Ya adina linglingon nadan tatagunan nun'ibalud.

34Ot dita'un namin an wahtun luta ya ta'on on nadan wah ad abunyan ya an namin nadan wah nan baybay ya hanat dayawon ta'uh Apu Dios.

35Te hi Apu Dios ya ipapto'nah ad Jerusalem ya ipaphodna nadan udum an nun'apa"ih an bobleh ad Judah ta pumboblayan nadan tataguna.

36Ta boltanon nadan holag nadan baalna an mangun'unud i hiya ta diday malinggop an munhituhdi.