1Hanat hi Apu Dios di bumoddang i he''a hi'on waday punligatam.

Ya hanat hiya an dinayaw handin ammod ta'un hi Jacob di mangih'ihwang i he"a.

2Ya hanat hiya an ma'alin wahnan pundayawan hi ad Zion di mangipabikah i he''a.

3Ya hanat umipa'amlong i hiya handidan inani'nongmu an ta'on on handidan naghob an ni'nong an ini'nongmun hiya.

4Ya hanat aton Apu Dios nadan pohdom ahan an ma'at ta mipa'annung an namin nadan ninomnommun ma'at.

5Ta wa'et nangabak'a on pun'itkukmiy pun'amlonganmi ya hay pangipabaktumi i Apu Dios.

Ot maphod on tobalon Apu Dios nimpe an namin nadan dawatom i hiya.

6Ad uwani ya innila' an hi Apu Dios ya ibaliwna nan pinto'nan mumpatul.

Ta hinan awadanah ad abunyan ya tobalonay dasal nan patul ta dakol di pangabakana an gapuh nan ongal an abalinana an Dios.

7Hanadan udum an tatagu ya pundinolanda nadan kalesadan e mi'gubat onu nadan kabayuda.

Mu da'mi'e ya idinolmih nan ongal an abalinan Apu Dios.

8Ot dadiyen adi mundinol i Apu Dios ya ma'abakda ta madadagda mu da'mi'e ya nanongnan mangabak ami.

9Hanat donglom bahan Apu Dios tun dasalmi ta pangabakom nan patulmi.