1Hi Apu Dios di paddungnay mamatal hi punnomnom'u ya hiyay mangih'ihwang i ha''on ta hiya nan ma"id ha itakut'u.

2Ya wa'e ta waha e mangipatnan mamate i ha''on hinadan adi maphod di punnomnomna ya adida abalinan.

3Ot ta'on on li''ubona' hi dakkodakkol an binuhul'u ya adiya' tumakut.

4Ha ahan di dawato' i Apu Dios ya onha mabalin ya pohdo' an mi'hituwa' hinan balenah ad uwanin atagu' te pinhod'un dayawon hiya ya pinhod'un tigtiggon nan nunhiglan amaphodna.

5Te hinan timpun di punligata' ya hiyay paddungnay ihi"uga'.

Ya madinola' an boddangana' te paddungnay iyeya' hi uhhun ha natagen doplah.

6Ta ma"id ha abalinan nadan binuhul'un munli''ub i ha"on ot ma"id ha bahhonan abako' dida.

Ta hiya nan hinan e' pangidawatan hi i'nong'un Apu Dios hidih nan pundayawan ya olto'olto' di pangikanta' hi pundayaw'un hiya.

7Ot hanat donglona' bahan Apu Dios hinan pumpahmo'a' i he''a.

8Ya wa'e ta nipanomnom i ha"on an dayawon da'a, on hiyay inat'u.

9Ot hanat adiya' bahan iwalong an baalmu ta adi gapuh bungotmun ha''on ya inganuya' te he''a damdama Apu Dios an mangih'ihwang i ha"on di innila' hi nanongnah bumoddang i ha''on.

10Ot ta'on hi inganuya' hinadan a'ammod'u ya madinola' an ipapto'a' i he''a.

11Ot hanat itudduwana' bahan Apu Dios hi nipto' hi ato' te dakkodakkolda tayya hantudan binuhul'u.

12Ya hanat adim bahan iyabulut an dadagona' i dida.

Te dakol tayyay layah an ipabahuldan ha"on ya nunhiglay panattatakutdan ha''on.

13Mu madinola' an ad uwanin atagu' ya amta' di amaphodmu Apu Dios.

14Ot hanat pabikahon ta'uy punnomnom ta'u ta mundinol ta'un namin i Apu Dios.

Ya ihamad ta'uy pangulug ta'un hiya.