1Hay nun'onan hi nomnom nadan tatagun adi maphod di pangatda ya hanadan pumbahulan.

Te ningamut an ma''id ha takutda i Apu Dios.

2Ya gapu ta nabaktuy pangibilangdah adolda ya hay innilada ya adi tigtiggon Apu Dios nadan at'attonda.

3Ya impa'inghadan lumayalayah ya hanadan adi maphod di impa'inghadan ibagabaga.

Ya hanadan adi maphod an pangat di nadadawoh hi atonda ta ma"id hi nomnomonda an mangat hi maphod.

4Ta ta'on on nibakilangdah nan alo'anda ya numanomnomdah adi maphod hi atonda.

Ta ma''id nimpe ha alyondah idinongdan mangat hinadan adi maphod an impa'inghada.

5Mu hanan pamhodmu ya pangipapto'mun da'mi Apu Dios ya adi malukud te umat hi numbattanan tun luta ya ad lagud.

6Ya umat hinan na'taggen billid an ma'attigo.

Ya atbohdih nan maphod an pangipanuhmun da'min tatagu an ma"id ha pogpogna an umat hi dinallom di baybay.

Te he"ay mangipanapto' i da'min tatagu ya ta'on on hanadan animal.

7Ot hanan munnananong an pamhodmu i da'mi ya ma"id ha nipaddungana.

Ta hanan pangipapto'mun da'min tatagu ya umat hi pangipapto' di manu' hinadan im'impahna.

8Te dakol nadan idatmun itanudmi.

Ya atbohdin idatmuy liting hi inumonmi an malpuh nan maphod an wangwang.

9Ya he''a nimpey alpuwan di itaguwanmi.

Ya ipa'innilam di maphod hi atonmi ta paddungnay patalam di nomnommi.

10Ot hanat minaynayun hidiyen pamhodmu ya pangipapto'mun da'mi an mangun'unud i he"a.

11Ta adim bahan iyabulut an abakona' ta pabtikona' hinadan tatagun adi maphod di pangatda.

12Mu ta didaot di magah ta tigonmi an adida bo aya abalinan an bumangon.