1Hanat adi ayu minomnoman an gapuh nadan tatagu an adi ahan maphod di pangatda ya hanat adi ayu umamoh i dida.

2Te umman lo'tat ya mama''idda an umatdah nan holo' onu nitanom an naba'gutda ta lo'tat ya maklingda.

3Hi Apu Dios ot eh'ay pundinolanyu ya hanadan maphod di atonyu ta wan malinggop di pi'taguwanyuh nan boblen indatnan da'yu.

4Ya hanat pun'amlonganyun unudon hi Apu Dios ot idatna nadan pohdonyun mawada i da'yu.

5Ot hanat hi Apu Dios di pangiyukodanyuh nitaguwanyu ta mundinol ayun hiya ot boddangan da'yu.

6Ta wan gapuh nan nipto' an pangatyu ya ipa'innilan Apu Dios hi atagutagu an ma"id ha bahulyu.

Ta umat ayuh nan algo an pintangna'e ya patalanan namin di abobboble.

7Ot hanat adi ayu nimpe numanomnom.

Ta pamaag ya nundinol ayun Apu Dios ta ukod i hiyah nan nitaguwanyu.

Ta adi ayu umamoh hi e kimmadangyanan nadan udum an tatagu an ta'on on hanadan e kumulukuluk.

8Ya adi hi kittang on bimmungot ayu te hay bungot ya adi maphod di pumbalinana.

9Hanadan mundinol i Apu Dios ya diday munhituh nan boblen imbagana.

Ya hanadan adi maphod di at'atonda ya madadagda.

10Ot adi madne ya mama"idda ta ta'on on eyu ana'anapon dida ya ma''id ha akhupanyun dida.

11Mu nadan mumpada''ul ya mun'am'amlongda te luminggop ya pumhod di itaguwanda hinan boblen idat Apu Dios i dida.

12Mu hanada'en adi maphod di pangatda ya numanomnomdah adi maphod hi atonda hinadan tatagun maphod di pangatda te nunhiglay hihiwodan dida.

13Mu hi Apu Dios ya ngihngihilana dadiyen tatagun adi maphod di pangatda te innilanan adi madne ya madadagda.

14Ta ta'on hi indadaanday ispadada ya panada ta eda patayon nadan nun'awotwot an maphod di pangatda

15mu onnot on mahunni ta nan ispadaday mamaten dida.

Ya atbohdin mun'apuputung nadan panada.

16Nan kittang an wadah nan maphod di pangatna ya nabalbalol mu nan kinadangyan nadan adi maphod di pangatda.

17Te dadagon Apu Dios nan abalinan nadan adi maphod di pangatda.

Mu ipapto'na nadan maphod di pangatda.

18Te ipappapto'na nadan na'unud i hiya ya idatnan dida nan imbaganah idatna.

19Ta ta'on on hinan timpun punligatan di tatagu an umat hi bitil ya adida mapuhan hi mahapulda.

20Mu nadan mi'buhul i Apu Dios an adi maphod di at'atonda ya adi madne ya mama''idda.

Ta umatdah nan humabung an holo' onu ahuk an agagga ya nama''idda.

21Adi ahan maphod di ato'atonda te eda umutang mu adida bayadan.

Mu hanadan mangat hinadan pohdon Apu Dios ya nundadaandan bumoddang ya mangdat hi iboddangdah ibbada.

22Ta diday wagahan Apu Dios ta diday pangdatanah nan boblen imbagana.

Mu hanada'en adi maphod di pangatda ya iwalongna didat madadagda.

23Ya ipapto'na nadan mangat hinadan umipa'amlong i hiya ya ituddunay nipto' hi atonda.

24Ya ta'on on waday apatnaanda ta paddungnay nikudlihda mu adida munnananong hidi te pata'dogon Apu Dios dida.

25Ya teen na'amammaa' mo ya ma''id ha tinigo' hi tagun mangmangngat hinadan miyunnudan hinan pohdon Apu Dios ya inwalongna.

Ya ta'on on hanadan i'imbabaleda ya aggeda e immodo'odoh anonda.

26Te onnot on diday nalakan mangdat onu mumpa'utang ya mawagahanday imbabaleda.

27Ot hanat idinong ta'u nimpe nadan adi maphod an pangat ta hanadan maphod di aton ta'u ta dita'uh nadan holag ta'uy munhituh inggana hinan boblen nidat i dita'u.

28Te hi Apu Dios ya nunhiglay pamhodna hinadan maphod di pangatna ya na'na'unnud i hiya ya adina iwalong dida te ipapto'na didah inggana.

Mu hanada'en holag nadan nibahhoy at'atonda ya lo'tat ya madadagda ta mama''idda.

29Ta hay pangidatanah tun boble ya hanadan mangmangngat hinadan pohdona ta punhituwandah inggana.

30Hanan hapiton nadan tatagun mangmangngat hinan pohdon Apu Dios di atiganan nanomnomanda te nipto' nadan ibagada.

31Te hanadan tugun Apu Dios di nun'onan hi nomnomda ta dadiyey nanongnah un'unudonda.

32Mu hanadan adi maphod di pangatda ya hahalipatanda nadan na'unud hinan pohdon Apu Dios te pohdondan patayon dida.

33Mu ihwang Apu Dios nadan mangmangngat hinan miyunnudan hinan pohdona.

Ya hi'on midalomda ya adina iyabulut an diday mibagah numbahul.

34Ot hanat hi Apu Dios di nanongnah pundinolan ta'u.

Ya nadan tugunay un'unudon ta'u ta dita'uy pangdatanah tun boble ta'uh inggana.

Ya akhupan ta'uy panadaganah nadan adi maphod di pangatda.

35Wada han tinigo' an adi ahan maphod di pangatna an nunhiglay pamalpaligatnah ibbana mu kimmakaddangyan an umat hinan immongngal an ma'aggangan kayiw.

36Mu indani ya nama"id ta e' punhama' ya ma''id.

37Mu tigonyu'e nan mangmangngat hinadan pohdon Apu Dios ya maphod di pi'hayyupanah ibbana an hiya otahan di mahlag ya pumhod di nitaguwana.

38Mu hanada'en adi mangat hinadan pohdon Apu Dios ya madadagda ta ma"id ha mabatih holagda.

39Te hi Apu Dios ya ihwangna nadan mangmangngat hinadan pohdona ya ipapto'na dida hi'on waday dumatong hi punligatanda.

40Ya boddangana ya ihwangna nimpe dida hinan aton nadan adi maphod di pangatda te hiyay nangidinolandah nitaguwanda.