1Hay wah nomnom'u ya mahapul an halipodpodo' an namin di ato' ya hapito' ta wan adiya' mumbahul.

Ya udu'dulnay pamaag'uy dindinong hi'on wadada nadan adi maphod di pangatda.

2Mu wa'e ta pamaag'uy dindinong ya mamammamay e' umukayungan.

3Ya hidin numanomnoma' ya lo'tat ya adiya' pa''itpol hi hakit di nomnom'u ot humapita' an alyo' di,

4Hanat ipa'innilam i ha''on Apu Dios hi'on atna moy algoh nabatih pi'taguwa' hitun luta ya hi'on anuud di ataya'.

5Innila' Apu Dios an ho'dod han inyabulutmun pi'taguwa' hitun luta.

Ta hin'omtang ya abuh han pi'taguwanmi an umat i ha dibdib an nala''uh.

6Ya umat boh nan a''o an agagga on nama''id.

Ta ta'on on ilapulaput di tagun e tumamutamu mu nat'on di ahi mangusal hinadan kinadangyana.

7Ot ad uwani ya na'awata' an ma"id ha udum hi namnamao' te he"a ya abuh di nahamad an pangidinola' hi nitaguwa'.

8Ot hanat ihwanga' bahan ta adiya' madusa an gapuh nadan numbahula'.

Ya hanat adim iyabulut an ngihngihilana' hinadan paddungnay ma"id ha nomnomda.

9Innila' Apu Dios an inyabulutmu datuwen punligata' ta hiya nan pamaaggot duminonga'.

10Mu daan mo bahan ta ipadinongmu datuwen panitilogmun ha"on te lo'tat mahan tayya ya iyate'.

11Ihingalmu ya titilgom nadan numbahul.

Ya dadagom dida an umat hi aton di pappap hinan mapmaphod an lubung.

Ta hay pi'taguwan di tagu ya on hin'omtang ya abuh an ay dibdib an nala"uh.

12Ot donglom bahan Apu Dios di dasal'u ta hom'ona'.

Ta'omman ot ho'dod nimpe han pi'taguwa' hitun luta an umata' i handidan a'ammod'u an paddungnay on ami nundagguh hitun luta ya abuh.

13Ot daan mo bahan ta bokon ha"on di totoklom ta mi'yam'amlonga' ni' ta ahiya' mate.

Te undan nateya"e ya wadaa' bo.