1Apu Dios, he"a ahan di ma'ahhapul'u an umata' hinan na"uwoh an ulha an adi mangmanghop an e manama' hi liting.

2Te he"an wadawadan Dios di ma'ahhapul'u.

Ta hiya nan aptuwa' di e' bo pundayawan i he"a.

3Te abigabigat ya ahodohodom ya ona' on lumuwaluwa an paddungnay hiyay itanud'u.

Ya hanada'en ma'hihhiwon ha"on ya ilutikdan alyonday, Daan bohna ta boddangan da'ah nan Dios an dayawom?

4Mahkit di nomnom'u hi'on nanginomnoma' din ugganmi abulogan an ipangulu' nadan tatagu hinan pundayawan i Apu Dios an mun'am'amlong amin mangit'itkuk hi pundayawmi ya punhanaanmi i hiya.

5Mu ad uwani ya wa'et minomnomana' on alyo' di undan nimmanomnomta'e ya nganney iboddangnan dita.

Pamaaggot eh'a ya inyohhay pundinol ya pundayaw i Apu Dios ta hiyay ukod an bumoddang ya mangihwang i dita.

6Mu hi ad uwani Apu Dios ya nunhigla tayyan umukayungana'.

Ta hiya nan nomnomnomon da'ah tun awada' an nihaggon hinan wangwang an nungngadan hi Jordan an mamangmang nadan billid an nungngadan hi Hermon ya nan billid an nungngadan hi Misar.

7Te hantun punligata' ya umat hinan mabikah an liting hinan wangwang onu nan maludulludun an dalluyun an mun'itabbun i ha"on.

8Mu hanat ipatigom Apu Dios nan munnananong an pamhodmu hi abigabigat.

Ta hinan mahdom ya ikankanta' di dasal'un he"a an alpuwan di nitaguwa'.

9Te he''a nan paddungnay doplah an ihi''uga' mu tanganuna' ingnganuy i he"a ta holholtapo' tayyay pangat nadan binuhul'un ha''on.

10Ta ta'on on hanan pangalida ya mahkit an paddungnay puntudukday puhu'.

Te alyonday daan bo anu ta boddangana' hinan Dios an dayawo'.

11Mu ad uwani ya wa'et minomnomana' on alyo' di undan nimmanomnomta'e ya nganney iboddangnan dita.

Pamaaggot eh'a ya inyohhay pundinol ya pundayaw i Apu Dios ta hiyay ukod an bumoddang ya mangihwang i dita.