1An namin ta'un tinatagu ya dayawon ta'uh Apu Dios.

Mumpalakpak ta'u ya olton ta'un mangikanta hi pundayaw ta'un hiya

2an na'abbaktun Dios te hiyay mun'ap'apu hi abobbobleh tun luta.

3Hiyay nangdat hi abalinan ta'u ta hiya nan inabak ta'uy abobbobleh tun luta ot iyukodna i dita'u ta dita'uy mun'ap'apu i dida.

4Ya hiya boy numpili hinan boblen indatnan dita'u an umipa'amlong i dita'un tinanud Jacob an na'appinhodnan tataguna.

5Impa'abak Apu Dios i dita'u nadan nunhituhdi ot mumbangngad hi ad abunyan hidih nan way trononan mun'ap'apu yaden pun'itkuk nadan tataguy kantada ya pun'ipagangohday trampetada.

6Ot ikankanta ta'uy pundayaw ta'un hiya an patul ta'u.

7Te hiyay patul hitun luta.

Ot hanat ikankanta ta'u nimpey pundayaw ta'un hiya an Dios

8an wahdin inumbun hinan tronona an mun'ap'apu hi abobboble.

9Ya nadan ap'apuh abobboble ya ma'amungda ta middumdan mundayawda i hiya an Dios an dinayaw din ammod ta'un hi Abraham.

Ta hiyay madayaw te hiya an Dios di Patul di apatupatul.