1O SENYÈ, ✡nan fòs Ou, Wa a va fè kè kontan.

Nan delivrans Ou, ki gran rejwisans li va gen!

2Ou te bay li dezi a kè li,

ni Ou pa t refize demand a lèv li yo.

3Paske Ou te vin rankontre Li avèk

benediksyon de tout bon bagay.

Ou te mete yon ✡kouwòn sou tèt li.

4Li te mande Ou lavi e Ou te bay li.

Yon vi ki long ak ✡jou k ap dire

jis pou tout tan.

5Glwa li gran nan sali pa Ou.

✡Onè ak majeste Ou te mete sou li.

6Paske Ou te fè li beni pase tout moun, jis pou tout tan;

Ou te fè li plen ak lajwa ✡avèk kè kontan nan prezans Ou.

7Paske wa a mete konfyans li nan SENYÈ a.

Epi akoz lanmou dous a Pi Wo a,

✡Li p ap ebranle menm.

8Men ou va ✡dekouvri tout lènmi ou yo.

Men dwat ou va jwenn sila ki rayi ou yo.

9Ou va fè yo tankou yon founo k ap brile nan tan kòlè ou.

SENYÈ a va ✡vale yo nèt nan kòlè Li,

epi dife va devore yo.

10Ou va detwi posterite pa yo soti sou latè,

epi ✡desandan yo ap disparèt pami fis a lòm yo.

11Malgre yo te anvizaje mal kont Ou,

e te ✡fòme yon konplo,

yo p ap reyisi.

12Paske Ou va fè yo vire do yo.

Ou va pwente ✡banza sou figi yo

ak bon kontwòl.

13Ke Ou leve wo, O SENYÈ,

ak tout fòs Ou!

Nou va ✡chante e bay lwanj a pwisans Ou.