1Ya alyon bon Apu Dios i Job di, On abalinam an bunwiton hinan baybay nan ma'alih lebiatan ya binobodmuy to'ona? 2Ya on abalinam an tudukon di olongna ta ga'odam onu kabngitom di pangalna ta ga'odam? 3Hi'on atom'ehdi ya on mumpahpahmo' nin i he''a ta ibulusmu? 4Ya on ibagana nin ta munhilbin he"ah inggana? 5Ya on mabalin ta ayumom an umat hi hamuti ta idatmuh nadan binabain imbabalem ta ay'ayyamonda? 6Ya on mabalin an ihaphapitam nadan mungkumilhu ta paltiyondat ilangitda? 7Ya on ikinanay balabog an igayangmuh adolna onu uluna? 8Mu onha ipatnam an mi'yawwit i diyen buwaya an ma'alih lebiatan ot wan adim mo ipidpidwan mi'yawwit i hiya. 9Te on ammuna udot ha panigan i hiya ot nunhiglan mungkobkobtah takut. 10Ta hiya nan ma''id ha mangitulid an e mamagbagan hiya.

11Ot nganney mangali hi waday utang'u i hiya yaden an namin di wadah tun luta ya ha"on di nunlumu.*

12Ipa'innila' i he"a an nan ma'alih lebiatan ya ongal di adolna ya ma'abbikah. 13Ya ma"id ha taguh pa'addoltak i hiya te tumulpu' nadan pahul hi bonogna ya ma"id ha pa'ahhethet hinan up'upna. 14Ya adi mabalin boh ta'angonday to'ona te nunhiglan atatakut nan bobana. 15Ya hanadan na'anod'oddah an uhipna di paddungnay hapiyona. 16Ya dadiye'en uhipna ya nundada''it ta ta'on on ha dibdib ya adi mabalin hi lumdib. 17Ya na'od'oddah nimpe nadan uhipna ta adi nimpe mabalin hi mahethet. 18Ya wa'et humakti ya bumonyag nan liting an pumagi'. Ya hana'en matana ya mumbolah an umat hinan manulun potang hinan mawi"it. 19Ya manawwangdah to'onay mundalang an apuy. 20Ya mun'ahuk di malpuh olongna an ay longahon di munluwag an nibangot. 21Ya hanan yahyahna ya mabalin an padalangonay uling te mamudduh hi to'onay apuy. 22Ya ongal di bagangna ta atatakut hi tigtiggon. 23Ya makulhin namin di adolnan ay gumo'. 24Ya mi'alig hi batuy puhuna te ma"id ha takutana. 25Ya wa'et immihal hituwen ma'alih lebiatan ya ta'on on hanadan udum an dios ya mamtikdah takutdan hiya. 26Ya ta'on nimpeh on waha munggayang i hiya ya adina ikina te tumulpu' nan gayang hi up'upna. 27Ya hay punli'nana udot hinan gumo' an igayangdan hiya ya ay dagami ya atbohdi nan gombang an ay nadunut an kayiw. 28Ya adina ikinay pana ya ta'on on bingngibingonda ya ay dugih di punli'nanah nan papan nan bingngibing. 29Ya ta'on boh on ba'dungandah kayiw ya adina ikina. Ya onaot ngihngihilan nan pahul an igayangdan hiya. 30Ya makulhi ya matadom di uhip di putuna ta mangmangnge'e ya ay na'aladu nan awona. 31Ya wa'e bo ta immeh nan baybay ya matigon makiwakiw nan liting ta ay munluwag an umat i ha munluwag an lanan nibangot. 32Ya wa'et munhalhallugan ya ma'ap'apya han ay upag an mitmitnud hinan awona. 33Ya hi an namin an animal ya ma''id ha udum hi umat i hiyan ma''id ha takutna. 34Ya ibilangnay adolnah ap'apun di an namin an animal. Te hay panigonah adolna ya ongal di abalinana mu nadan udum.