1Ya alyon bon Apu Dios i Job di, 2Undan ingganah ad uwani ya mi'yahhiyan'a i ha''on an ongal di abalinanan Dios? Analyom hi nibahho nadan inat'u ot pohdom'e ya agam ta munhapitta ta tobalona' i he"a.

3Ya alyon Job di, 4Ha"on ya bumaina' hitun niyata' an tagu ta hiya nan ma''id ha pambal'uh nadan ibagam. 5Imbagabaga' mo nadan pohdo' an ibaga ot undan nganne hanan e' bo alyon.

6Ya hi Apu Dios ya nunnanong an wadah nan alipuhhapu ot alyona i Job di, 7Aga'e ta munhapitta ta waday mahmaha' i he''a mu mahapul an tobalom. 8Te pinhod'un innilaon hi'on immannung an he"ay nipto' ya ha"on di nibahho. 9Athinay pangalim mu undan hanan abalinam ya nipaddung hinan abalina'? Ya undan nipaddung hi kidul di hapitmu an umat hi hapit'u? 10Athidi'ey a'atmu ya agam ta ipatigom an madayaw'a ya na'abbaktu'a. 11Ya agam ya ta ipatigom di bungotmuh nadan munlattuwag ta way atondan mumpada''ul. 12Ta pumbalinom nadan munlattuwag hi ma''id ha hilbida ya dinadagmu nadan adi maphod di pangatda an ta'on on danay awadanda. 13Ya ingka"utmu dida ta mimihdidah nan ilubu'anda. 14Ot hi'on abalinam an aton danae ya abuluto' an nangabak'a te ongal di abalinam.

15Nomnomnomom nadan atatakut an animal an ma'alih hipopotamus an mangan hi holo' an umat hinan baka an ha"on di nunlumu i dadiye an umat i he"a. 16Ya hidiyen animal ya ma'abbikah an malpuh putuna ya hukinay bikahna. 17Ya na'andong di iwitna an umat hinan na'andong an kayiw an sedar ya makulhiy lamoh di ulpuna. 18Ya hanada'en tungal di hukida ya umat hinadan ma'aggangan gumo'. 19Ya an namin nadan animal an limmu' ya hiyay abikbikahan ya ha"on ya abuh di mabalin an mamaten hiya. 20Ya hanada'en anona ya dakol hinadan nabillid an pun'ay'ayaman di udum an animal. 21Ya hay ena punhiduman ya hinadan pu''un nadan nun'apagatan an kakaykayyiw onu hinadan mahagabong an holo'. 22Ta hay tubun dadiyey uggan manidum ya mili'woh i hiya. 23Ya ta'on on dumakol di liting hinan wangwang an nungngadan hi Jordan ya adi tumakut an onnot on ma'dinnol. 24Ya ma''id ha mabalin hi mamilok i hiya ta dopapona. Ya ma"id bo ha taguh abalinanan tabikawan di olongna ya gina'odana.