1Ot alyon Elihu i Job di, Aga'e pibo Job ta igongaham tun ibaga'. 2Te umman tayya nundadaana' an mangibagah tudan wah nomnom'u. 3Ya maphod di punnomnom'u an adiya' munlayah. 4Te innila' an nan Espiritun Apu Dios di nunlumun ha''on ya hiya an ongal di abalinanan Dios di nangdat hi nitaguwa'. 5Ot hanat nomnomnomom di pambalmuh tudan ibaga'.

6Te numpapaddung ta'uh hinangngab Apu Dios an nalpu ta'uh pito'. 7Ta hiya nan adi'a tumakut i ha''on te ma"id ha punnomnom'uh paligato' di nomnommu. 8Ya na'adngollo' nadan imbagabagam 9an alyom hi ma''id ha itakutmu te ma''id ha numbahulam. 10Te alyom di, Omman hi Apu Dios di nangap'apyah ipabahulnan ha"on ot ibilanga' hi binuhulna. 11Ta paddungnay binangkilinganay huki' ya hinahalipatanay pangaya'.

12Mu ni'ibbahho danaen inalim te hi Apu Dios ya na'abbaktu mu hay tagu. 13Ya tanganu on'a munlilin hiya ta alyom hi adina tobalon di ibagan di tatagun hiya? 14Te hi Apu Dios ya nat'onat'on di atonan mi'hapit hi tatagu. 15Te hinuddum ya hinan alo'an ya ipatigonah in'inop onu ipatigona nan pohdonan ibaga. 16Ya hinuddum bo ya ipa'innilana i dita'u nan ninomnomnan ma'at ta way aton ta'un tumakut. 17Athidiy atona ta way aton di tatagun mangidinong an bumahubahul ya munlattuwag 18ya ta ihwangnay tataguh eda adadagan onu atayan.

19Ya hay oha boh panitilog Apu Dios ya hay dogoh ta way aton di tagun um'ummohnong hinan alo'ana. 20Te wa'et mundogoh di tagu ya ma"id ha naminhodnan mangan ta ta'on on maphod nan makan ya adina anon. 21Ta lo'tat ya napigut ta matigoy tungalna. 22Ta hay atayana moy hadhaddona ya abuh.

23Mu onha nin waha oha ni'moh nadan linibun anghel Apu Dios hi umalin mangita'dog hi tagu ta ibagana an hidiyen tagu ya ma"id ha bahulna 24ya waot nin an alyon Apu Dios hinan anghel di, Tigom ta adi mateh naen mundogoh te waday manapung hi bahulna. 25Ta pamaag ya pinumhod hidiyen mundogoh ya nibangngad nan a'at di up'upna an umat hidin a'ungana. 26Ya wa'et mundasal ya tobalon mohpen Apu Dios di dasalna. Ta mun'am'amlong mohpe bon mundayaw i hiya. 27Ya ahina mohpe alyon hinadan tatagu di, Numbahula' peman te adi maphod di inat'u ta hiya nan unhaot ongal di dusa' mu himmo'a' i Apu Dios ta manghan di nundusana i ha"on. 28Ya inihwanga' hi ate ta hiya nan nunhiglay amlong'u ituwen pi'taguwa'.

29Athidiy ato'aton Apu Dios hi tatagu 30an ihwa'ihwangna didah ate ta way atondan mun'am'amlong an mi'tagu.

31Ot duminong'a e Job ta igongaham tun ibaga'. 32Mu hi'on waday pinhodmun ibaga ya ibagam ta donglo' te pinhod'u damdaman innilaon hi'on ma"id ha bahulmu. 33Mu ma''id'e ha ibagam ya duminong'a nimpe ta donglom tun ibaga' ta itudduwan da'a ta way atom an manomnoman.