2Undan waday hilbin di tagu i Apu Dios?

Ta'on on nan nala'ing an tagu ya ma"id ha hilbina i hiya.

3Ya undan waday gun'udon nan ongal di abalinanan Dios hi'on maphod di pangat di ohan tagu ya hi'on ma''id ha bahulna?

4Ya undan hanan pangun'unudam i hiyay nundusaanan he"a?

5Manu'eh na'at hinaen he"a ya gapuh nadan dakol an numbahulam.

6Te wa'et ipa'utangam nadan ibbam on gahin on waha idatdah pangidonam.

Ta adida'e attog pa'abbayad on inalam di lubungda ta mumbolbolladda.

7Ya ma"id ahan ha alyon hi pa'inumam ya panganom hanadan na'uwoh ya na'agangan an humawwang hi nunhituwam.

8Yaden kadangyan'a an dakol di lutam ta nundongol'an tagu.

9Ya aggem binoddangan nadan nun'abalu an mumbagah boddang i he"a.

Ya numpulohmuy pangalan nadan nun'apuhig hi mahapulda an gapu attog ta ma''id ha mangita'dog i dida.

10Ta hiya nan palpaliwam ya dimmatong datuwen atatakut an ma'ma'at i he"a.

11Ta paddungna moy wada'ah nan munhihillong onu paddungnay dimmakol di liting ot malting'a.

12Hi Apu Dios ya wadah nan na'abbaktu hi ad abunyan ta ta'on on hanadan bittuwon ya uh'uhdungana.

13Ta adim alyon on agge tinigon Apu Dios nadan at'attom hinan munhihillong.

Ya adim alyon hi adina dusaon di tatagu te ma"id ha tinigonah nadan at'attonda.

14Ya adim alyon on adi pa'attigo i dita'u hinan ena pundaldallanan hinan baktun tun luta te hinawanan nan bugut.

15Ta innaynayunmuh nan adi maphod di pangat an umat hi pangat di adi maphod di at'attondan tatagu.

16Mu nadan athidiy pangatda ya nipaddungdah nan bale an dimmakol di liting ot miyanud te nateda an ta'on on bokon hidiyey timpun atayanda.

17Ya dida nan nangali i Apu Dios hi, Taynan da'mi ta ukod ami te he"a an ongal di abalinanan Dios ya ma"id damdama ha atom i da'mi.

18Mu ta'on on athidi ya impakadangyan Apu Dios dida.

Ta hiya nan adi' ma'awatan di punnomnom dadiyen adi maphod di pangatda.

19Mu wa'e tuwali ta dusaon Apu Dios dida ta munholholtapda ya ahi ngihngihilan nadan tatagun maphod di pangatda

20an alyonday, Nadadag bo aya nadan binuhul ta'u ot mapu'ulan di kinadangyanda.

21Ot hay maphod Job, ya mumpada"ul'a ta mi'hayyup'a i Apu Dios ta wagahan da'a i hiya.

22Ta nomnomnomom nadan tuguna ta dadiyey un'unudom.

23Ya onha ibangngadmun umun'unud hinan ongal di abalinanan Dios ya itutuyum nadan numbahulam ya indinongyun hina'amman mangat hi adi maphod ot pumhod di nitaguwanyu.

24Ya hanat bokon hay pihhuy nonomnomom ta ibilangmu nadan balitu' hi batuh nadan wa"el an ma''id ha balolda.

25Ta nan ongal di abalinanan Dios moy pumbalinom hi nabalol an odonmu an umat hi balitu' onu silber.

26Athidi'ey ma'at ya pa'amlongon da'an Apu Dios ya ma"id mohpe ha iyaguhmun hiya.

27Ya mundasal'a'e mohpe ya donglon da'an hiya ya ipa'annungmu bo damdama nadan imbagam hi atom.

28Ya an namin moy nomnomom an aton ya maphod di pumbalinana.

29Mu wa'e ha ma'aliggatan ya alyon ta'uh gapu ta mumbaktu mu hi Apu Dios ya boddangana nadan mumpada"ul.

30Ot hi'on immannung an ma''id ha numbahulam ya ihwang da'an hiya.

Te hi Apu Dios ya ihwangna nadan immannung an ma"id ha numbahulana.