Ot aga'e ta ibaga' ot udot nadan lili' an gapuh hakit di nomnom'u.

2Ta alyo' i Apu Dios di, Adi namaag ya dinusaa' mu ta ibagam nan numbahula'.

3Te tanganu onmu pun'amlongan an mamalpaligat i ha"on an limmum?

Udu'duldaot bo nadan adi maphod di pangatda te pa'amlongom dida.

4Undan hay panigom ya umat hi panigomin tatagu?

5Ya undan ho'dod di pi'taguwam an umat i da'min tatagu?

6Tanganu on gahin nayya hi'on pa'abbudham di numbahula'

7an ta'on on innilam an ma"id ha bahul'u?

Ya innilam bon ma"id ha mabalin hi mangihwang i ha"on hinan ongal an abalinam.

8Ya undan bokon he"ay nangapyah tudan agimangnun di adol'u mu ten ad uwani ya he"a boy manadag i ha"on?

9Ya nomnomom an pito' di iniphodmuh tun adol'u.

Ya undan pabangngadona' ot boh nan pito' an nalpuwa'?

10Ya he"ay nunlumu i ha"on ot pa'ongngalona' hi putun ina.

11Ot iphodmu nadan tungal ya ulat ya lamoh tun adol'u ot ahim libbutan hi up'up.

12Ot idattana' hi yahyah'u ta mataguwa' ya nali'na' di pamhodmu ya pangipapto'mu i ha"on.

13Mu innila' an datuwen inatmun ha''on ya hiyay ninomnommu tuwalin aton.

14Ya tigtiggom nadan ato' ta numbahula"e ya adiya' pakawanon

15ta ona' punholholtapon.

Mu hanadan maphod an ato' ya ma"id ha hilbinan he"a.

Ta hiya tayya nan maligatana' ya bumaina' hitun nitaguwa'.

16Ya wa'et mapmaphod di ma'ma'at hinan nitaguwa' ya ay'a layon an manganup i ha"on ta pangipatigom an ongal di abalinam an manadag i ha"on.

17Ya wadan waday tudduwom hi muntistigun numbahula' ta mamammamay bungotmun ha"on.

Ta pangigadulam an mangipa'alih nadan punholholtapa'.

18Udu'dulnaot boh on aggem inyabulut an niyayyama' onu nateya"ot tuwalih din hiyah niyayyama' ta aggeya' tinigoh udum an tatagu.

19Ta innayuna' ot eh'an e inlubu' mu hanan eya' timmagu i ha athitu.

20Tuwe mahan mo teen mapogpog tun ho'dod an nitaguwa' ot daan mo bahan ta idinongmun mamalpaligat i ha"on ta luminggopa' i ha ta'on on ha na'omtang ni'mo.

21Te undan immeya"e moh nan munhihillong an awadan di nunnaud an e umukayungan ya undan wa bo ha alyon hi mibangngada'.

22Ya hidi'e ya ma''id ha matigoh patal te nunhiglan munhihillong ya ma''id ha pohopohodnahdi.