3Udu'dulnaot boy aggeya' niyayyam.

4Mu ta'on on athidi ya hanat pahilongon Apu Dios hidiyen algo ta adina uggan papatalon ya hanat linglingonah diyen algo.

5Ya onha mabalin ot punnanongona an munhihillong hidiyen algo an hophopanah nan bugut ta adi pumatal.

6Ya ta adi mibilang hidiyen algo hinan hintawon.

7Ya hanat ma''id ha uggan miyayyam i diyen algon nangiyayyaman ina i ha"on.

Ta ma"id ha madngol hi mun'am'amlong i diyen nahdom.

8Ya hanat hidiyen algon niyayyama' ya idutan nadan nalot di idutna an dadiye nadan abalinandan mangipahawwang hinan ma'alih lebiatan hinan baybay.

9Ya nadatngan'eh diyen algo ya hanat ma"id ha dumilag hinadan bittuwon i diyen mawi"it ya hanat adi tumulu nan potang ta adi mabmabiggat.

10Ta ma'idutan hidiyen algo te aggena impagol di niyayyama' ya ahi athitun ona' munholholtap.

11Mu tanganu nin tuwalih on aggeya' nateh din hiyah niyayyama'?

12Ya tanganuna' nin tuwali impanapto' i ina an udu'dulnay aggeya' impa'inuman i hiya ta nateya'.

13Te onha nateya' ya waot eh'a an ma'allinggopa' an mun'ib'ibleh ad uwani

14an ibba' nadan patul ya nadan a'ap'apuh tun luta an dida nadan nundongol an nun'iphod hi dakol an palasyu an nun'apapa"ih hi ad uwani.

15Ya waninnot an nidduma' hinadan nun'a'ate an a'ap'apu an nun'amung hi dakol an balitu' ya silber hitun luta.

16Ot udu'dulna nimpey nateya' hidin niyayyama' ta agge' tinigoy a'at di patal.

17Te hinan atayan ya hidiyey apogpogan di pangatan di taguh adi maphod ya pun'iblayan nadan maligatan.

18Ya i diye boy awayawaya'an nadan nibalud te ma''idda mo nadan guwalyan mummandal i dida.

19Ya hay atayan'e ya numpapaddungda moy nawotwot hi kadangyan an ta'on on nadan himbut ya nawayada mo.

20Mu tanganu nin on inyabulut Apu Dios an minaynayun di pi'taguwan nadan munholholtap.

21Ta ta'on on hihimlonday atayanda on adida mate.

Ta nunhiglay naminhoddan mate mu hay namhoddah nadan nun'abalol an ikadangyan.

22Ta ma''id mo ha udum hi mangipa'amlong i dida hi'on bokon hay atayanda.

23Ya tanganu nin tuwalih on minaynayun di pi'taguwan nan mahmo' an tagu yaden ma"id damdama ha namnamaonah maphod hi ma'at?

24Te alyon hi'on ta mangan ya ontaot pumalapalak.

Ya ma"id tayya ha alyon hi duminong di hakit tun ligato' an paddungnay liting an malpuh nan obob an umayu'ayuh.

25Ya hanadan itattakut'un ma'at ya dadiye ot tayyay na'at i ha"on.

26Ta ma''id ha namnamao' hi e' luminggopan onu ha e' pun'iblayan te nunhigla tayya tun holholtapo'.