2Hanat donglonyu bahan tun ibaga' ta hituwe han mabalin an atonyun mangipa'amlong i ha"on.

3Ot hanat igongahanyu ta indappuh'u'e nan ibaga' ya ahiya' mohpe ngihngihilan onu pihulon.

4Te hay punliliya' ya bokon hay tagu te hi Apu Dios.

Ta hiya nan nunhiglay bohol'u te ayna adi dongdonglon di ibaga'.

5Te onha tuwali ot ta'on on ammuna nan panigoyun ha"on ya masda'aw ayu.

6Te ha''on ni'mo tee ot nomnomnomo"e tun ma'ma'at i ha"on ya gumayonggonga' hi takut'u.

7Te tanganu nin on hanadan tatagun adi maphod di pangatda ya nanongnan mataguda ya kumadkadangyanda.

Ya ma'amammada on ahida nate.

8Ta tigonday maphod an pumbalinan di imbabaleda ya tigonday a'apapuda.

9Ya ma"id ha ipa'alin Apu Dios hi dumadag hi pamilyada ta ma"id ha itakutda.

10Ya dumakol an dumakol di halunda te ma"id ha mateh nadan inlumda.

11Ya nadan u''ungan imbabaleda ya umanam'amlongdan e mun'ay'ayyam an ayda inlum di kalneron ahi panaypaytu.

12Ya ahikakantada an unnudandah nan tamburin ya harp ya ungngiyong on nannannayoda.

13Ya ma"id ha punligatan nadan a'ammodda te wadan namin di mahapulda ya malinggopda ta ingganah atayanda.

14Ya alyonda bo udot i Apu Dios di, Umman adi da'a mahapul.

Ya ma"id ha naminhodmin manginnilah nan a'atmu.

15Ya nganne ihyah naen ongal di abalinanan Dios ta e punhilbiyan?

Ya nganne ihya hanan gun'udon an mundasal i hiya?

16Te hay punnomnomda ya hana'e anun pumhodan di nitaguwan ya gapuh nan abalinan.

Mu adi' abuluton hidiyen punnomnomda.

17Mu ta'on peman on athidi ya ma''id ha alyon hi ma'agagda te numbahulda.

Ya mihwangda peman hinadan dumadag an umat hi puwo' ya nadan udum.

Ya ma"id ha bimmungotan Apu Dios ot dusaona dida an gapuh nadan adi maphod an at'atonda.

18Ya ma''id bo ha alyon hi nama"idda an umat hi dugih an inyaddib di dibdib.

19Ya mabalin an alyonyuy ta'on on adi dusaon Apu Dios hanadan mangmangngat hi adi maphod hi ad uwani mu udum hi algo ya dusaona nadan imbabaleda.

Mu hay punnomnom'u ya maphod on hanadan numbahul di madusa ta li'naonday dusan di bahulda.

20Ta diday manigo ya munli'nah nan pundusan nan ongal di abalinanan Dios i dida an gapuh nadan bahulda.

21Te undan nate'e mo nan tagu ya waha bo ha alyon hi iyaguhna nadan imbabalena.

22Mu undan mabalin hi tudduwanyuh Apu Dios an hiyay ap'apun di an namin an ta'on on hi ad abunyan.

23Wadaday tatagun mate an ma"id ha dogohda ya malmallinggopda te wadan namin di mahapulda 24ya maphod di nangadolda.

25Mu wadada boy udum an nawotwotda ta maligligatanda ta ingganah mateda.

26Mu hay oha ya kadangyan onu nawotwot ya numpaddungda an nateda'e ta nilubu'da ya mabigihan di adolda.

27Innila' di wah nomnomnomonyu ya ta'on on hanadan adi maphod an pohdonyun aton i ha"on.

28Te mabalin an alyonyuy, Tigonyu'e nan kadangyan mu adi maphod di pangatna an daan bohnay niyayan nadan balena.

29Mu onha mahmahanyuh nadan uggan mumbaat ot ibagada

30an hanadan adi maphod di pangatda ya mihmihwangdah nadan punligatan an ipa'alin Apu Dios an gapuh bungotna.

31Mu ma"id ha natulid an e mangibagan dida an numbahulda ya ma"id ha mundusa i dida.

32Ya wa'et nateda ta nilubu'da ya maguwalyaan di lubu'anda.

33Ya hinan eda pangilubu'an i dida ya dakkodakkolday tatagun mitnud ya mapmaphod nan lubu'anda.

34Wan hay innilayu ya mipa'amlonga' hinadan agge immannung an ibagabagayun ha''on.