2Mahkit di nomnom'u te ta'on on ma''id ha bahul'u ya athituy na'at i ha''on.

Mu ibaga' hinan wadawadan Dios

3an ta'on on ituwen nabatin pi'taguwa'

4ya hanat ma"id ha ibaga' hi adi maphod onu ha layah.

5Ot adi' abuluton an nipto' nan imbagayu i ha''on.

Ya ta'on on nganney ma'at ya ibaga' an ma''id ha bahul'u.

6Ya inaynayun'un mangat hi maphod.

Ta udum hi algo ya ma''id ha alyo' hi na'at datuwen ha"on te numbahula' peman tuwali.

7Hanat dusaon Apu Dios nadan mi'buhul i ha"on an umat hi pundusanah nadan mangmangngat hi adi maphod.

8Ta ma"id ha namnamaon nan adi umunud i Apu Dios hi'on pogpogonay nitaguwana.

9Ya dumatong'ey punligatanda ya adi donglon Apu Dios di dasalda.

10Te ma"id ha amlongdan mundayaw i hiya an ongal di abalinanan Dios ya adida uggan mundasal i hiya.

11Ot aga ta tudduwan da'yuh nan a'at nan ongal di abalinanan Dios.

12Mu nomnomnomonyu an unhaot adi gahin hi ituddu' te tinannigoyuy a'atna mu tanganu on athina an ma"id ha hunung nadan ibagabagayu.

13Nan ongal di abalinanan Dios ya dusaona nadan mangmangngat hi adi maphod.

14Ta ta'on on dakol di imbabaleda mu matedah gubat ya nada'en udum ya matedah inagangda.

15Ya hanada'e bon mihwang i dadiye ya hay dogoh di mamaten dida.

Ya nateda'e nadan mangmangngat hi adi maphod ya adi ibaluwan nadan ahawada dida.*

16Ya ta'on on nitapu"ul di inamungdah silber an umat i ha nitapu"ul an hupu' ya dakkodakkol di lubungda

17mu bokon diday mangilubung te nadan tatagun imbilang Apu Dios hi maphod.

Ya ta'on on nadan pihhuda ya hanadan umun'unud i Apu Dios di mangogodwa.

18Ya mangammadah baleda mu agge nahamad an umat hi balen di kakawwa.

Ya umat boh nan allung an punhiduman nadan mun'adug hinan nitanom.

19Ta kadangyandah ad uwani mu ahida pangigib'an an ma"id an namin di kinadangyanda.

20Te ma'ibagan dumatong han atatakut an punligatanda an umat hinan dumakolan di liting ya inyanudna dida.

Ya umat bo i ha ma'abbikah an puwo' hinan mahdom

21an malpuh nangappit hi tuluwan di algo ya inye"ena dida.

Ta ta'on on wadadah nan nunhituwanda ya miyaddibda.

22Ta atonday abalinandan mangihwang hi adolda mu onaot on ih'ihbod ta mumpinnati'da an paddungnay ma"id ha homo' nan puwo' i dida.

23Ta paddungnay tagu nan puwo' an palpalakpakana ya nginihngihilana dadiyen mun'iya'addib.