1Ya alyon bon Elihu di, Wa'et waday puwo' ya nunhiglay kobkob di puhu' hi takut'u. 2Ot donglonyu nan kidul an paddungnay hidiyey hapit Apu Dios. 3Te pabinangona'e nan kilat hi ad lagud ya mabinangan an namin tun luta. 4Ya indani ya madngol di nunhiglan umipakaynit an kidul. 5Ta athidi nimpey hapit Apu Dios ya dakol nadan udum an at'atonan umipamodwong an naligat an ma'awatan. 6Te hiyay mangibagah nadan dalallu ya udan ta magahdah tun luta. 7Ya manu'eh ipa'alin Apu Dios datuwe ya ta way aton di tatagun duminong ni' an e muntamu ta tigonda nan ongal an abalinana. 8Ya ta'on on hanadan animal ya eda manama' hi eda ihi"ugan. 9Ya impa'alin mohpen Apu Dios nan puwo' ya nan kotol. 10Ya hanan yahyah Apu Dios ya abalinanan pakulhiyon nan liting ta ma'attuning. 11Ya abalinana bon ha"adan nadan bugut hi liting ya impa'unudna nan kilat. 12Ta kumpulnay pohdonan pangipa'ayan hinan kilat ya ma'at. 13Mu hinuddum ya ipa'alina datuwe ta pundusanah tatagu onu ipa'alina nan udan ta ma'udanan tun luta ta pangipatigonah pamhodnah nadan tatagu.

14Ta hiya nan donglom Job ta nomnomnomom nadan nakaskasda'aw an at'aton Apu Dios. 15Te undan innilam hi'on nganney aton Apu Dios an mangipabonyag hinan kilat hi ad lagud. 16Ya undan innilam on tanganu on adida magah nadan bugut hi ad lagud? Datuwey mangipatigo an hi Apu Dios ya ongal di abalinana. 17Ya aggem innila nadan at'attona te nan ipa'alina an ma"atung an dibdib ya maligatan ta'u. 18Ya undan abalinam an bumoddang i hiya an mangiwakat hinadan bugut hi ad lagud ta pumbalinonyu nan bugut hi ay diggal?

19Hi'on hay punnomnommuh adolmu ya nala'ing'a ya daan mo ta itudduwan da'mih ibagamin Apu Dios te aggemi innilay ibagamin hiya. 20Ha''on'e ya adi' hihimlon an e mi'hapit i hiya te adi' pohdon an dadagona' i hiya.

21On ni'mo agge'e nabugutan nan algo ta nunhiglan humili ya ma"id ha taguh attaonan mangitatangad hi ad lagud 22ya namama mo ahan hinan binang nan ongal di abalinanan Dios an nalpuh huddo'na. 23Nan ongal di abalinanan Dios ya adi mabalin hi tigon ta'u. Ya ongal nimpey abalinana ya maphod ya nipto' di pangatnah tatagu. 24Ot hiya nan hanat dita'un tatagu ya taktan ta'u hiya. Te hi Apu Dios ya adina hanguton nadan munlattuwag an tatagu an hay punnomnomdah adolda ya nanomnomanda.