1Hidin indinong Job an humapit ya alyon nan oha bon ibbanan hi Bildad an tinanud Suah di,

2On nagibbuh mo hanadan ma''id ha hunungnan hapi'hapitom?

3Undan mabalin ihya hi pumbalinon nan ongal di abalinanan Dios nan nipto' hi nibahho?

4Hanadan imbabalem ya ma''id ha bahhonan numbahulda ta hiya nan dinusan Apu Dios dida.

5Mu ta'on on athidi ya mumpahpahmo"ah nan ongal di abalinanan Dios ta boddangan da'a.

6Te hi'on immannung an nipto' di pangatmu ya nundadaan an mangipabangngad hinan maphod tuwalin a'at di pamilyam.

7Ya hanan kinadangyanmu handi ya adi mipaddung hinan kinadangyan an idatna.

8Ya daan mo ta adalom nadan tugun handidan a'ammod.

9Te hay tagu ya dakol di adina ma'awatan ya na'omtang ya abuh han pi'taguwanah tun luta an umat hinan a''o an nala''uh'e ya ma"id mo.

10Ya dadiyen tugun an inadal ta'u i handidan a'ammod ya itudduwan dita'uh nadan nipto' hi aton.

11Adi mabalin an dumudduke nadan hagagga* hinan adi munliliting te mateda hi'on adi malitingan.

12Adida umat hinan udum an holo' an hiyah diyen mataguda.

13Ot athidiy ma'at hinan tagu an lininglingnah Apu Dios an ma"id ahan ha namnamaonah maphod hi ma'at i hiya.

14Te nundinol hinadan nalakan mapa"ih ta paddungnay e nihi"ug i ha balen di kakawwa.

15Ya nundinolanay kinadangyana mu onnot on ma"id ha abalinan nan kinadangyanan mangihwang i hiya.

16Ta umat i ha nitanom an nadanuman'e on ahi pinumtang ya mapmaphod nan nitanom.

17Ya hanan lamutna ya nun'ihamad an nili'mut hinadan batu.

18Mu wa'et naba'gut ya lo'tat ya malingling an hiya din nitanom ni' hidi.

19Ot nomnomnomom an athidiy apogpogan di nitaguwan di ohan tagu an umat i diyen holo' an hidiyey pogpog di pi'yamlongana ta lo'tat ya nat'on di humango i diyen himmangawana ni'.

20Hanadan mangun'unud i Apu Dios ya boddangana dida mu hanadan adi maphod di pangatda ya iwalongna dida.

21Ot he"a Job ya mabalin an pa'amlongon da'a ta wan it'itkukmuy amlongmu.

22Mu hanada'en binuhulmu ya ba'bainona ya dadagona dida ya ta'on on nadan nunhituwanda.