Tanganu nin on ma"id ha gintud Apu Dios hi punhumalyaanah tatagu?

Te umaptuda nadan umun'unud i hiyan manigoh pundusaanah nadan adi maphod di pangatda.

2Te datuwen tatagu ya idoldolday pogpog ta pulhonday lutan di ibbada.

Ya inibtikday kalneron di udum on iniddumdah nadan kalneroda.

3Ya nun'aladay dongkin nadan nun'apuhig ya ta'on on nadan baka an puntamuwon nadan nabalu ta ingganah bayadanda nadan impa'utangdan dida.

4Ya nunhiglay pangatdah nadan nun'awotwot ta hiya nan nunhiglay takutdan dida.

Ta eda mo attog mipmippa''e.

5Ta umatdah nadan atap an dongki an ilaputdan e manamanama' hi anonda ya hay ipa'andah nadan imbabaledah nan agge naboblayan.

6Ta mapilitanda mon e mamanuh nadan imbatin di munggapas onu hinan nun'apitan nadan adi maphod di pangatdan tatagu hi greyp.

7Ya mamaktolda attog hinan mahdom te ma"id ha lubungda ya ulohda.

8Ya ma"id ha baledah umanamutanda ta kumpulnah nan billid on nalo'da ta immudan'e on nahnongda on eda nihi"ug hinadan liyang.

9Hanada'e an adi maphod di pangatda ya pa'utanganda nadan nun'awotwot ta wa'e attog ta adida pa'abbayad on inalada nadan imbabaleda ta diday mibayad.

Ya ta'on on hanadan napuhig an goggolang on inalada ta pumbalinonda didah himbut.

10Ya mapilitandan muntamu nadan nun'awotwot an ta'on onda numbollad te ma"id attog ha lubungda.

Ya ta'on boh onda e bumunabunag hi binto' mu ma"id ha iyanamutdah anonda ta ma'a'aganganda te hanadan kakadangyan di ud bagi i dadiye.

11Ya ta'on hi kumopakopaldah olibo mu adida tamtaman.

Ya atbohdin ta'on on agandah kopal hi greyp ta iphoddah bayah mu adi mabalin hi tamtamanda.

12Ya mun'atte'atteda attog nadan nun'ahuhugat an nun'awotwot ta ahipapalakdan mumpahpahmo' i Apu Dios.

Mu paddungnay adi dongdonglon Apu Dios nan dasalda.

13Ya wadaday mungngohe i Apu Dios ta adida abuluton nadan tuguna an mabalinot an mamatal hi nomnomda ya adida pohdon an aton nadan pohdona.

14Te hinan munhihillong an agge ni' nabigat ya lumah'unda ta eda patayon nadan nun'awotwot.

Ya wa'e bo ta nahdom ya eda nangako.

15Ya atbohdih nadan umiluktap hi ahawada an hihimlonday ahdomana ta ma"id ha manigon dida ya hinophopanday angahda ta ma"id ha mangimatun i dida.

16Ya hanada'e nimpen mangako ya eda hogpon di babaleh nan mahdom ta mapatal'e ya eda nipa''en malo'.

Ta hiya nan aggeda imminghah mapatal.

17Ta mapatal'e nimpe on nalonalo'da ta hinan mahdom di eda pangatan hinadan pohpohdondan aton.

18Mu mipaddungdah nan upag hinan liting an adi madne ya mama"idda.

Ya na'idutan nadan lutada ta ma"id ha e muntanom hidi.

19Hanadan dalallu ya pinumtang'e ya mi'bagadan ma'umah.

Ya athidi boy ma'at hinadan adi maphod di pangatda an mun'a'ateda ta mama''iddah tun luta.

20Ta ngupuhon di bigih di adolda ta lo'tat ya ma"id ha munnomnom i dida an ta'on on nan hi inada.

Ta mipaddungdah nan kayiw an nabuwag.

21Athidiy ma'at i dida te nunhiglay nangatdah nadan binabain ma''id ha holagda.

Ya ma"id ha homo'dah nadan nun'abalu.

22Ya ta'on on alyon hi waday abalinanda ya kadangyanda mu hi'on hi Apu Dios di manadag i dida ya mamingpinghandan madadag.

23Ta ta'on on alyon hi iyabulut Apu Dios an malinggop di nitaguwanda mu tigtiggona damdama nadan at'attonda.

24Ta ta'on nimpeh on kumadangyanda ya mundongolda mu adi madne ya mipada"ulda ta umatdah nan nitanom an wit an nun'agapas.

25Ot nganne i da'yuy mangibaga hi agge immannung datuwen inali'ali'?