1Alyon bon Elihu i Job di, 2Undan hay punnomnommu Job ya nipto' nan alyom hi ma"id ha bahulmun Apu Dios? 3Ya alyom bo udot hi nganne ihyay gun'udo' on adiya' mumbahul.

4Pohdo' an tobalon nan imbagam ya nadan imbagan tudan ibbam. 5Ya tangadom'eh ad lagud ta pa'tiggom nadan bugut. 6Ta'on on'a bumanahubbahul ya ma"id ha ma'at i Apu Dios. 7Ya atbohdi hi'on maphod di at'attom an ma"id ha iddummuh nan anabaktun Apu Dios. 8Hanan pangatam hi adi maphod ya hay ibbam an taguy mapaligat ya nan pangatam hi maphod ya maboddangan nadan ibbam an tatagu.

9Wa'et nunhiglan maligatan nadan tataguh pangat nadan mamalpaligat i dida ya amod onda e mumpaboddang hi udum. 10Mu ma"id ha alyondah hi Apu Dios an nunlumun diday pumpaboddanganda an ta'on on hi Apu Dios di nangdat hi abalinanda an mangikantah nadan kantan mangalubyag i dida 11ya hiya boy nangdat i dita'un tatagu hi abalinan ta'u ta nala'la'ing ta'u mu hanadan animal ya hanadan muntayyapan an hamuti.

12Mu ta'on damdamah on mumpaboddangda ya adi tobalon Apu Dios di dawaton nadan munlattuwag ya nadan adi maphod di pangatda. 13Ta hiya nan ma"id ha hilbinan mumpahpahmo'dan hiya te adi donglon nan ongal di abalinanan Dios nan ibagada. 14Ot namama mo i he''a Job an ni'ibbahho nan alyom di adi matigoh Apu Dios ta hiya nan adina donglon di ibagam. 15Ya atbohdi nan alyom hi adi dusaon Apu Dios nadan bumanahubbahul. 16Ot ma''id ha hunung nadan ibagabagam te paddungnay ma''id ha nomnommu.