1Ot gapu ta athidin ihihikkad Job an mangali hi ma''id ha bahulna ya indinong mon nadan tulun ibbana an mambal hinadan ibagana. 2Mu wahdin mundongdongngol han hi Elihu an imbabalen Barakel an holag Ram an tinanud Bus. Ya nunhiglay boholna te adi abuluton Job an nipto' hi Apu Dios hi nundusaana i hiya. 3Ya atbohdiy boholna hinadan tulun ibban Job te ma"id ha maphod hi nambaldah nadan imbagabagan Job mu pinahiwda damdamah Job.

4Ya gapu ta hi Elihu ya ung'unga mu dida ya pamaaggot dindinong ni' ta ingganah nalpahdan himmapit 5mu bimmungot te ma"id mo ha pambal nadan tulu hinadan imbagan Job. 6Ta hiya nan alyonay, Gapu ta ong'ongongngal ayu mu ha"on ya mun'og'ogona' an mangibagah tudan wah nomnom'u. 7Te hay punnomnom'u ya da'yuy humapit te nanomnoman ayu tatawwa. 8Mu hanan Espiritun nan ongal di abalinanan Dios an niddum hi tagu di mangdat hi la'ing di tagu. 9Ya bokon hanan e na'am'ammaan di atigana an nanomnoman ya nala'ing di ohan tagu. 10Ta hiya nan hanat donglonyu tun ibaga' an wah nomnom'u.

11Ot tinigoyu an inanusa' an nundongdongngol hinadan imbagabagayu. 12Mu dongdonglo' ya adi ayu pa"atbal hinadan ibagana ta mipa'innilan hiya ya numbahul. 13Ot adiyu alyon hi nala'ing ayu mu unhaot alyonyuy, Hi Apu Dios di ukod i Job ta bokon da'min tataguy mambal i hiya. 14Te onha ha"on di ni'hapitan Job ot bokon nan inaliyuy alyo' i hiya.

15Ot tee mahan an hinipol da'yun Job ta ma''id ha pambalyun hiya. 16Ot adi gapu ta dindinnongan ayu mo ya iyopot'u ta dindinonga' damdama 17te mahapul an ibaga' tun wahtuh nomnom'u. 18Te gahin ahan tayya on'u ibaga nadan pinhod'un ibaga. 19Te hi'on adi' ibaga ya lo'tat ya umata' hinan iha"adan di ma'inum an lo'tat ya mabughi. 20Ta hiya nan mahapul nimpen ibaga' nadan pinhod'un ibaga. 21Ya ma"id ha pangipangngela' hinan ibaga' te hanadan immannung an malpuh nomnom'uy hapito'. 22Te onha athidiy ato' ot ma''id ha bahhonan dusaona' i Apu Dios.