1Alyon bon Apu Dios i Job di, On innilam hi'on anuud di pun'imbabalayan nadan atap an gulding? Ya on waday tinigom hi mun'imbabale an ulha? 2Ya on innilam hi'on atnay bulan an mala"uh ya ahida mun'imbabale? 3Umman wa'et mun'imbabaleda ya munyohonda ta adi mipakpak nadan imbabaleda. 4Ya wa'et immongngalda ya ukodda mohpeh pangpangayyanda an adi gahin di eda hama'on nan hi inada.

5Ya ha"on di nangibulus hinadan atap an dongki ta umedah nan pohdondan pangayan. 6Ya ha''on boy nangdat hi punhituwandah nan agge naboblayan an dakol di ahina. 7Ta midawwidah nadan boblen dakol di tagu ya ta ma"id ha mamilit i didan muntamu. 8Ta eda manama' hi anondah nadan nabillid an awadan di munlangtan holo'. 9Te nadan atap an animal ya adi mabalin hi puntamuwom onu pun'adugom hinan balem. 10Ya adi mabalin hi taliyam ta pun'aladuwom didah nan puntanomam. 11Ya adi bo mabalin hi idinolmun dida nan naligat an tamum an gapu ta mabikahda. 12Ya adi mabalin hi pungkalgaom didah nadan ginapasmu ta iyedah nan pun'ilikan.

13Ya hanan ongal an hamutin ma'alih ostrits ya mapmaphod hi pamayyadanah nadan paya'na mu adina abalinan an abakon di inawiging nan ma'alih stork an tumayap. 14Ya pamaaggon tinaynana nadan itlugnah nan luta ta nan lutay mangipa'atung ta mapahda. 15Ya adina iyaguh hi'on waday mangigattin hi tagu onu animal i dadiyen itlugna. 16Ya mabungot hinadan impahna an ay bokon hiyay ud impah ya adi minomnoman hi'onda mate. 17Athidiy a'atna te agge' indattan dida hi maphod an punnomnom onu la'ing. 18Mu wa'e ta bumtik ya punla"uhanay nungkakabayu.

19Ya on he''a Job di nangidat hi bikah nan kabayu ya nan mapmaphod an munlaplapen ibu' hi bagangna? 20Ya on abalinam an papaytu'on ta ay ba"atong? Ya on he''ay nangidat hi abalinanan mangipagangoh olongna ta atatakut hi donglon? 21Ya wa'et puntakkayan an umeh gubatan ya pun'igamuhnay hukinah nan luta ta ipatigonan mabikah. 22Ya hi'on wadah gubatan ya ma''id ha alyon hi bumtik hi takutnah nadan ispada 23an ta'on on ahikikilat nadan ispada ya pahul nadan tindalu. 24Ya adi munhinad hinan timma'dogana ta butikonan umeh gubatan hi'on dingngolna nan gangoh di tangguyub. 25Ya ta'on on nidawwi ya ilmunan waday gubat. Ya donglona nan pummandal nadan opisyal hinadan tindaluda. Ta wa'et gimmangoh nan tangguyub di gubat ya tobalonan mummehehehe' ya ihiknan e mi'gubat.

26Ya undan he"ay nanudduh nadan gayang ta tumayapdan ipluydah muyyadna? 27Ya undan he"ay nangitudduh nadan agila ta eda mangapyah buyadah nan atagetagen doplah? 28Ta hidiy iha"adanda ta ma"id ha iyaguhda. 29Ta uhdunganday kumpulnan mabalin an eda alan hi anonda. 30Ta wada'ey tinigodah nate ya na'amungdah nadan impahda ta anonda.