2Alyom hi nanomnoman'a mu tanganu on athinay panapitmu an ma"id ha hunung di hapitom?

3Udu'dulnay idinongmun humapihapit te ma''id ha iboddang danaen ibagabagam.

4Ya tanganu on ay ma"id ha takutmun Apu Dios ya ma"id ha pundayawmun hiya?

5Te hanan hapitom ya ipa'innilana nan adi maphod an a'atmu.

Ya handiyam di numbahulam hinan panapitmu.

6Ma''id ha imbaga' hi numbahul'a mu hanan to'om di nangiba''ag hi a'atmu.

7Ya hanan punhapihhapitmu ya ay hanan wada'a tuwalih din kanaman ot ahi mawada nadan billid.

8Ya undan wada'a an ni'idngol hinan ninomnom Apu Dios an aton?

Ya undan inohhaam di la'ing.

9Mu undan nganneda ihya nadan innilam ya na'awatam an aggemi innila ya aggemi na'awatan?

10Inadalmi nadan innilamih nadan nun'a'ubanan ya nun'anomnoman an ong'ongngal mu hi amam.

11Ma'uley panapit Apu Dios i he"a ot undan nganne boy ohah ibagam?

12Ya tanganun'a bumubbungot ya athina nayyan matadom di panpannigom i da'mi?

13Ya tanganu on hi Apu Dios di pangiboholam ta athinay pangalim i hiya?

14Undan waha taguh imbilang Apu Dios hi maphod?

15Hanada ni'mon a'anghel hi ad abunyan an munhilbin hiya ot ma"id ha dinolnan dida

16ya namama mahan moh tagu an nalakan mumbahul.

Te nan bahul ya umat hi liting an nalakah e ta'u pangukmunan.

17Ot donglom'e ta ibaga' dohah nadan tinannigo' ya dingngodingngol'u

18an datuwe nadan inadal'uh nadan nun'anomnoman an dingngolda damdamah nadan a'ammodda

19an dida din nangdatan Apu Dios hinan numboblayanda hidin ma"id ni' ha udum hi numboblehdi.

20Ot datuwe nadan dingngol'u an nan tagun adi maphod di pangatna an umat hi paligatonay ibbana ya munholholtap ta ingganah mate.

21Ya dakol di mipanomnom i hiyan umipatakut.

Ya ta'on on malinggop ya iyaguhna an ay waha manggop hi balena.

22Ya tumakut bon umeh nan munhihillong te iyaguhnan alinah waday mamaten hiya.

23Te innilanan agagga moy atayana ya alina ya anon di gayang di adolna.

24Ta tumattakut ya minonomnoman an umat i ha patul an nundadaan an e mi'gubat hinadan tuwen mangubat i hiya.

25Ya manu'e hi athidiy ma'ma'at i hiya ya kinalitna nan ongal di abalinanan Dios.

26Ta pohdonan mi'hangga i hiya an umat i ha tindalun nunhahapiyo ta e mi'gubat.

27Hanan adi maphod di pangatnan tagu ya ta'on on kadangyan ya maphod di nangadolna

28mu udum hi algo ya e mumbobleh nan nadadag an boble ya e miha"ad hinan nabao ya napa''ih an bale.

29Ya lo'tat ya mapuh di kinadangyana ta ma''id ha abalinana.

30Ya adi mibahhoy atayana ta umat i ha kayiw an nalngoh'e ya mitungu ta ingganah magbu nadan hapangna.

Ta ammuna ha panapudan Apu Dios i hiya ya miyaddib.

31Ot hanat adi mundinol hi kinadangyana te ma"id ha hilbinah udum hi algo te ma"id ha magun'udna.

32Ta ta'on moh on agge ni' nadatngan di atayana ya mate ta umat hinan hapang di kayiw an inayun nadan tubunan makling.

33Ya umat boh nadan greyp an mun'a'agah di bungana an ta'on on aggeda ni' nalum.

Ya umat boh nadan olibo an madluh di habungna.

34Te hanadan adi umunud i Apu Dios ya ma"id ha holagda.

Ya hanadan mun'aphod an baleda an nalpuh nadan hina'ulda ya inakoda ya maghobda.

35Te dida nadan numanomnom an mangat hi adi maphod ta ha'ulonday ibbada.