Muqeddes Kalam (latin yéziq) Zebur 132

132-küy •••• Xudaning ehde sanduqi we Xudaning Dawutqa bolghan wedisi •••• 1-ayettiki izahatni körüng

1«Yuqirigha chiqish naxshisi»

I Perwerdigar, Dawut üchün u tartqan barliq jebir-japalarni yad etkeysen;

2U Perwerdigargha qandaq qesem ichken,

Yaquptiki qudret Igisige qandaq wede qilghan: —

3-5«Perwerdigargha turar jayni,

Yaqupning qudretlik Igisige makanni tapmighuche,

Öyümdiki hujrigha kirmeymen,

Kariwattiki körpemge chiqmaymen,

Közümge uyquni,

Qapaqlirimgha mügdeshni bermeymen».

6Mana, biz uning xewirini Efratahda angliduq;

Uni ormanliq étizlardin taptuq;

7Uning turar jaylirigha bérip kireyli,

Uning textiperi aldida sejde qilayli;

8Ornungdin turghin, i Perwerdigar,

Sen qudritingning ipadisi ehde sanduqung bilen,

Öz aramgahinggha kirgin!

9Kahinliring heqqaniyliq bilen kiyindürülsun,

Mömin bendiliring tentenilik awazni yangratsun!

10Qulung Dawut üchün,

Özüng mesih qilghiningning yüzini yandurmighaysen;

11Perwerdigar Öz heqiqiti bilen Dawutqa shu qesemni qildi,

U uningdin héch yanmaydu: —

U: — «Öz pushtingdin chiqqan méwidin birsini textingde olturghuzimen;

12Perzentliring Méning ehdemni,

Hem Men ulargha ögitidighan agah-guwahlirimni tutsa,

Ularning perzentliri menggüge textingde olturidu» — dégen.

13Chünki Perwerdigar Zionni tallighan;

U Öz makani üchün uni xalighan.

14Mana U: — «Bu menggüge bolidighan aramgahimdur;

Mushu yerde turimen;

Chünki Men uni xalaymen.

15Men uning rizqini intayin zor beriketleymen;

Uning yoqsullirini nan bilen qandurimen;

16Uning kahinlirigha nijatliqni kiygüzimen,

Uning mömin bendiliri shadliqtin tentenilik awazni yangritidu.

17Men bu yerde Dawutning münggüzini bixlandurimen;

Özümning mesih qilghinim üchün yoruq bir chiragh békitkenmen;

18Uning düshmenlirige shermendilikni kiygüzimen;

Emma uning kiygen taji béshida ronaq tapidu» — dédi.

□132:1 «I Perwerdigar, Dawut üchün u tartqan jebir-japalarni yad etkeysen;....» — bu küy birinchidin, Dawutning Perwerdigar üchün ibadetxana qurushqa ichken qesimini bildüridu hem shu chaghdiki Xudaning Dawutqa jawab bérip qilghan wedisini («2Sam.» 7-bab) eslitidu; ikkinchidin, Dawutning kéyin Xudaning ehde sanduqini Kiriat-Yéarim (yeni Efratah, öz yurti bolghan Beyt-Lehemge yéqin) dégen jaydin ekilip, tentenilik halda Yérusalémgha kirgüzgenlikinimu eslitidu. Bu küy belkim Dawutning bir ewladi (Sulayman yaki uningdin kéyinki birsi) padishah bolghanda qilghan duasi bolushi mumkin. «Dawut ... tartqan barliq jebir-japalar» — mushu yerde belkim Dawutning Xuda üchün muqeddes bir öyni yasashqa bolghan ejirini körsitishi mumkin.

□132:6 «...biz uning xewirini Efratahda angliduq» — «uning xewiri» belkim birinchidin Xudaning ehde sanduqini körsitidu; ikkinchidin bésharetlik halda Mesihning Beyt-Lehemde tughulushini körsitishi mumkin. «Uni ormanliq étizlardin taptuq» — yaki «Uni Yaarning étizliridin taptuq». «Yaar» «Kiriat-Yéarim» bolushi mumkin («1Sam.» 7:1ni körüng).

□132:10 «Qulung Dawut üchün, Özüng mesih qilghiningning yüzini yandurmighaysen» — belkim Dawutning padishah bolidighan ewladi üchün qilghan duasi. Xudaning «mesih qilghini» toghruluq yuqiriqi 2-küy we izahatlarni, shundaqla «Tebirler»nimu körüng.

Notes