49-küy •••• Pütün insan’gha bérilgen nesihet-agahlandurush
1Neghmichilerning béshigha tapshurulup oqulsun dep, Korahning oghulliri üchün yézilghan küy: —
I barliq xelqler, köngül qoyup anglanglar!
Yer yüzide turuwatqanlar, qulaq sélinglar!
2Meyli addiy puqra, ya ésilzadiler,
Ya bay, ya gadaylar bolsun, hemminglar anglanglar!
3Aghzim danaliqni sözleydu,
Dilim eqilge uyghun ishlarni oylap chiqidu.
4Quliqim hékmetlik temsilni zen qoyup anglaydu,
Chiltar chélip sirliq sözni échip bérimen.
5Éghir künlerde, méni qiltaqqa chüshürmekchi bolghanlarning qebihlikliri etrapimda bolsimu,
Men némishqa qorqidikenmen?
6Ular bayliqlirigha tayinidu,
Mal-mülüklirining zorluqi bilen chongchiliq qilidu;
7-9Insan menggüge yashap,
Gör-hangni körmesliki üchün,
Héchkim öz buraderining hayatini pul bilen qayturuwalalmaydu;
We yaki Xudagha uning jénini qutuldurghudek bahani bérelmeydu;
(Chünki uning jénining bahasi intayin qimmet,
We bu baha boyiche bolghanda, menggüge qerz tapshurushi kérektur)
10Hemmige ayanki, danishmen ademlermu ölidu;
Hemme adem bilen teng, nadan we hamaqetler bille halak bolidu,
Shundaqla ular mal-dunyasini özgilerge qaldurup kétidu.
11Ularning könglidiki oy-pikirler shundaqki:
«Öy-imaritimiz menggüge,
Makan-turalghulirimiz dewrdin-dewrgiche bolidu»;
Ular öz yerlirige isimlirini nam qilip qoyidu.
12Biraq insan özining nam-izzitide turiwermeydu,
U halak bolghan haywanlardek kétidu.
13Ularning mushu yoli del ularning nadanliqidur;
Lékin ularning keynidin dunyagha kelgenler, yenila ularning éytqan sözlirige apirin oquydu.
Sélah.
14Ular qoylardek tehtisaragha yatquzulidu;
Ölüm ularni öz ozuqi qilidu;
Etisi seherde duruslar ularning üstidin höküm yürgüzidu;
Ularning güzelliki chiritilishqa tapshurulidu;
Tehtisara bolsa ularning heywetlik makanidur!
15Biraq Xuda jénimni tehtisaraning ilkidin qutquzidu;
Chünki U méni qobul qilidu.
Sélah.
16Birsi béyip kétip,
Aile-jemetining abruyi ösüp ketsimu,
Qorqma;
17Chünki u ölgende héchnersisini élip kételmeydu;
Uning shöhriti uning bilen bille görge chüshmeydu.
18Gerche u ömür boyi özini bextlik chaghlighan bolsimu,
(Berheq, kishiler ronaq tapqiningda, elwette séni haman maxtaydu)
19Axiri bérip, u yenila ata-bowilirining yénigha kétidu;
Ular menggüge yoruqluqni körelmeydu.
20Insan izzet-abruyda bolup, lékin yorutulmisa,
Halak bolidighan haywanlargha oxshash bolidu, xalas.