Muⱪeddes Kalam (yǝngi yeziⱪ) Zǝbur 28

28-küy •••• Pǝrwǝrdigarƣa tayinix

1Dawut yazƣan küy: —

I Pǝrwǝrdigar, Sanga nida ⱪilimǝn;

I mening Ⱪoram Texim, manga süküt ⱪilmiƣaysǝn;

Qünki Sǝn jimjit turuwalisang,

Mǝn qongⱪur ⱨangƣa qüxidiƣanlarƣa ohxaxla bolimǝn.

2Sanga pǝryad kɵtürginimdǝ,

Sening muⱪǝddǝs kalamhanangƣa ⱪolumni kɵtürginimdǝ,

Mening iltijalirimning sadasini angliƣaysǝn!

3Meni rǝzillǝr wǝ ⱪǝbiⱨlik ⱪilƣuqilar bilǝn billǝ taxliwǝtmigǝysǝn;

Ular aƣzida yeⱪinliri bilǝn dostanǝ sɵzlǝxsimu,

Kɵnglidǝ ɵqmǝnlik bardur.

4Ularning ⱪilmixliriƣa ⱪarap,

Ixlirining yamanliⱪiƣa ⱪarap ix tutⱪaysǝn;

Ⱪolining ⱪilƣanliri boyiqǝ ɵzlirigǝ yandurƣaysǝn;

Tegixlik jazani ɵzlirigǝ ⱪayturƣaysǝn.

5Qünki ular nǝ Pǝrwǝrdigarning ⱪilƣanlirini,

Nǝ ⱪollirining ixligǝnlirini ⱨeq nǝzirigǝ almaydu,

Pǝrwǝrdigar ularni ƣulitip, ⱪaytidin bax kɵtürgüzmǝydu.

6Pǝrwǝrdigarƣa tǝxǝkkür-mǝdⱨiyǝ ⱪayturulsun;

Qünki U mening iltijalirimning sadasini angliƣan.

7Pǝrwǝrdigar mening küqüm, mening ⱪalⱪinimdur;

Mening kɵnglüm uningƣa ixǝndi,

Xuning bilǝn yardǝm taptim;

Xunga kɵnglüm zor xadlinidu,

Ɵz küyüm bilǝn mǝn Uni mǝdⱨiyilǝymǝn.

8Pǝrwǝrdigar Ɵz hǝlⱪining küqidur,

Xundaⱪla mǝsiⱨ ⱪilƣiniƣa ⱪutⱪuzƣuqi ⱪorƣandur.

9Ɵz hǝlⱪingni ⱪutⱪuzƣaysǝn,

Mirasingni bǝrikǝtlik ⱪilƣaysǝn;

Ularni padiqidǝk beⱪip ozuⱪlandurƣaysǝn,

Mǝnggügǝ ularni kɵtürüp yürgǝysǝn.

□28:2 «Sening muⱪǝddǝs kalamhanangƣa ⱪolumni kɵtürginimdǝ» — «kalamhana» muⱪǝddǝs qedirdiki «ǝng muⱪǝddǝs jay»ni kɵrsitidu. Nemixⱪa muxu yǝrdǝ «ǝng muⱪǝddǝs jay» «kalamhana» deyilidu? Sǝwǝbi, «ǝng muⱪǝddǝs jay» iqidǝ «ǝⱨdǝ sanduⱪi» yatidu, «ǝⱨdǝ sanduⱪi» iqidǝ Huda Israil bilǝn tüzgǝn ǝⱨdinamǝ (Hudaning sɵz-kalami) saⱪlaⱪliⱪ idi.

□28:8 «Pǝrwǝrdigar ... mǝsiⱨ ⱪilƣiniƣa ⱪutⱪuzƣuqi ⱪorƣandur» — Hudaning «mǝsiⱨ ⱪilƣini»: — (1) Huda Israillar üstigǝ tikligǝn padixaⱨ; (2) ahirda u dunyaƣa ǝwǝtidiƣan Ⱪutⱪuzƣuqi-Mǝsiⱨni kɵrstidu. «Mǝsiⱨ» toƣruluⱪ 2-küydiki izaⱨatlarni ⱨǝm «Tǝbirlǝrni» kɵrüng.

□28:9 «Ɵz hǝlⱪingni ⱪutⱪuzƣaysǝn, mirasingni bǝrikǝtlik ⱪilƣaysǝn;...» — Hudaning Ɵz hǝlⱪi dǝl Ɵzining mirasi ikǝnliki Muⱪǝddǝs Kitabta kɵp yǝrlǝrdǝ tilƣa elinidu.

Notes