25-küy •••• Yetǝklǝx wǝ baxpanaⱨ bolux ⱨǝⱪⱪidǝ dua •••• 1-ayǝttiki izaⱨatni kɵrüng
1Dawut yazƣan küy.
Pǝrwǝrdigar, jenim Sanga tǝlmürüp ⱪaraydu;
2Sanga tayinimǝn, i Hudayim;
Meni yǝrgǝ ⱪaritip hijalǝttǝ ⱪaldurmiƣaysǝn;
Wǝ yaki düxmǝnlirimni üstümdin ƣalib ⱪilip xadlandurmiƣaysǝn;
3Bǝrⱨǝⱪ, Seni kütküqilǝrdin ⱨeqⱪaysisi xǝrmǝndǝ bolmas;
Biraⱪ ⱨeqbir sǝwǝbsiz hainliⱪ ⱪilƣuqilar xǝrmǝndǝ bolidu.
4Meni Sening izliringni bilidiƣan ⱪilƣaysǝn, i Pǝrwǝrdigar;
Yolliringni manga ɵgitip ⱪoyƣaysǝn.
5Meni ⱨǝⱪiⱪitingdǝ mangdurup, manga ɵgǝtkǝysǝn;
Qünki ɵzüng mening nijatliⱪim bolƣan Hudayimdursǝn;
Mǝn kün boyi Sanga ⱪarap tǝlmürimǝn;
6Ɵz rǝⱨimdilliⱪliringni, ɵzgǝrmǝs meⱨirliringni yadingƣa kǝltürgǝysǝn, i Pǝrwǝrdigar!
Qünki ular ǝzǝldin tartip bar bolup kǝlgǝndur;
7Mening yaxliⱪimdiki gunaⱨlirimni,
Xundaⱪla itaǝtsizliklirimni esinggǝ kǝltürmigǝysǝn;
Ɵzgǝrmǝs muⱨǝbbiting, meⱨribanliⱪing bilǝn, meni esinggǝ kǝltürgǝysǝn, i Pǝrwǝrdigar;
8Pǝrwǝrdigar meⱨriban wǝ durustur;
Xunga U gunaⱨkarlarni durus yolƣa salidu.
9Mɵminlǝrni yahxi-yamanni pǝrⱪ etixkǝ U yetǝklǝydu;
Mɵminlǝrgǝ Ɵz yolini ɵgitidu.
10Uning ǝⱨdisi wǝ ⱨɵküm-guwaⱨlirini tutⱪanlarning ⱨǝmmisigǝ nisbǝtǝn,
Pǝrwǝrdigarning barliⱪ yolliri ɵzgǝrmǝs muⱨǝbbǝt wǝ ⱨǝⱪiⱪǝttur.
11Ɵz naming üqün, i Pǝrwǝrdigar,
Ⱪǝbiⱨlikim intayin eƣir bolsimu,
Sǝn uni kǝqüriwǝtkǝnsǝn.
12Kimki Pǝrwǝrdigardin ǝymǝnsǝ,
Huda Ɵzi talliƣan yolda uningƣa ⱨǝⱪiⱪǝtni ɵgitidu;
13Uning jeni azadǝ-yahxiliⱪta yaxaydu,
Uning nǝsli yǝr yüzigǝ miras bolidu.
14Pǝrwǝrdigar Ɵzidin ǝyminidiƣanlar bilǝn sirdaxtur;
U ularƣa Ɵz ǝⱨdisini kɵrsitip beridu.
15Mening kɵzlirim ⱨǝmixǝ Pǝrwǝrdigarƣa tikilip ⱪaraydu;
Qünki U putlirimni tordin qiⱪiriwetidu.
16Manga ⱪarap meⱨir-xǝpⱪǝt kɵrsǝtkǝysǝn;
Qünki mǝn ƣeribanǝ, dǝrdmǝndurmǝn.
17Kɵnglümning azarliri kɵpiyip kǝtti;
Meni basⱪan ⱪismaⱪlardin qiⱪarƣaysǝn.
18Dǝrdlirimni, azablirimni nǝziringgǝ alƣin,
Barliⱪ gunaⱨlirimni kǝqürgǝysǝn!
19Mening düxmǝnlirimni nǝziringgǝ alƣin,
Qünki ular kɵptur;
Ular manga qongⱪur ɵqmǝnlik bilǝn nǝprǝtlinidu.
20Jenimni saⱪliƣaysǝn, meni ⱪutⱪuzƣaysǝn;
Meni xǝrmǝndiliktǝ ⱪaldurmiƣaysǝn;
Qünki mǝn Seni baxpanaⱨim ⱪildim.
21Kɵngül sapliⱪi wǝ durusluⱪ meni ⱪoƣdiƣay;
Qünki mǝn Sanga ümid baƣlap kütüwatimǝn.
22I Huda, Israilni barliⱪ külpǝtliridin ⱪutⱪuzup ⱨɵrlükkǝ qiⱪarƣaysǝn!