Hay Ipabagtuan nan Tatagud Jerusalem
1Ya inalin goh Apo Dios di,
“Paddungnay bumangon ayun iJerusalem ta umat ayuh nan algaw an bumnang
ti wadan da'yuy benang'u!
2Tigonyun hinophopan di helong tun luta ta nahelngan ayun amin,
mu nan benang'un Dios ya pinatalan da'yu!
3At nan Hentil ya nan a'alidah nan abablubabluy ya umalidan da'yu
an dumalat nan patal an wan da'yu
an umat hinan patal hinan mahoyang.
4At amangonyu nan nunlene'woh ti den mumpanga'anamutda nan i'ibbayu!
Ya ta"on goh nan imbabaluyyun mun'alpudah nan adagdagwin babluy
an didan amin hinan tataguh nan abablubabluy an nalpuwanda.
5Mun'alitag di matayu ti nidugah di umamlonganyu
ti pun'ita'in nan tataguh nan udum an babluy di inadangyandah nan umalianda.
Ya ta"on hi un nan wah nan babluy hinan numpinangngel an baybay
ya pun'ita'indan iyali goh di inadangyandan da'yu.
6Ya nidugah an do'ol ahan di numpuntakay hinan kamilu
an malpudad Midian, ya ad Ephah, ya ad Sheba
an mangiyalih nan balitu' ya nan incense hi pundayawdan Ha"in.
7Ya do'ol goh di kalnilud Kedar ya ad Nebaioth hi midat ay da'yu
ta way me'nong hinan pun'onngan ta way mangipa'amlong ay Ha"in.
Ya do'ol di maphod an iyalidah mihinah nan me'gonan an Timplu'.”
8Ya inalin goh Apo Dios di,
“Ngadan hadin mun'abi'ah an tumayap an umat hinan bunut,
ya umatdah nan kalapatin umanamut hinan agabanda?
9Dida hanay pupul ad Tarshish an mumpangiyanamut hinan tatagu'!
Ya nun'ita'inda goh nan silver ya balitu' hi pundayawdan Ha"in an me'gonan ad Israel
ti mipattig ay da'yu nan amaphod'u ya benang an malpun Ha"in.
10Ya nan bunag an nalpuh udumnan babluy di mangipaphod an mangiyammah nan nun'apa"in allupyu,
ya nan a'aliday munhulbin da'yu.
Hidin hopapna ya minolta' da'yu an dumalat di bungot'u,
mu ad ugwan ya igohgoha' da'yu an dumalat di homo"u.
11At nan babluyyu ya munnononnong an mibubughul
di pantaw di allupyuh abigabigat ya amahdomahdom
ta way aton nan Hentil hi abablubabluy an mangipanguluh nan a'alidan
mangiyalih nan inadangyandan da'yu.
12Ti nan tataguh nan babluy an adi munhulbin da'yu ya mapogpogda.
13Ya nan mun'aphod an ayiw an bolbol, ya fir, ya cypress
an malpuh nan inalahan hi ad Lebanon ya miyali
ta way miyammah nah nan babluyyud Jerusalem ya nan Timplu'
ta pumhodan nan babluy'u.
14At umali nan holag din nangipaligligat ay da'yu ta munluungdan da'yu
ta ipattigday pange'gonandan da'yu.
Ya ta"on goh din namahipahiw ay da'yu ya umalidan munluung ay da'yu.
Ya ngadnanda tun babluyyuh
Siudad ad Zion an Babluy nan Me'gonan an Dios di i'Israel.
15At adi ayu mahkay minganuy ya ma'abohlan an mid managhaggung ay da'yu
ti idat'u mahkay di ipabagtuanyuh enggana
hi iyamlong nan aholaholagyuh mi'id di pogpogna.
16Ya halimunan da'yuh nan udum an tatagu ya nan a'ali an malpuh udum an babluy
an umat hi panalimun nan babaih nan imbaluyna.
At hiyah ne panginnilaanyu an Ha"in di baliwyu
an nidugah di abalina' an Dios an dayawonyun holag Israel.
17Ya nan balitu' di idat'un da'yu an bo'on nan gambang,
ya idat'u goh di silver an bo'on nan gumo',
ya idat'u goh di gambang an bo'on nan ayiw,
ya idat'u goh di gumo' an bo'on nan batu.
Ya ma'ulay mahkay nan mumpangipapto' ay da'yu,
ya adi da'yu mahkay paligaton,
ya nahamad ya malenggop di atondan mumpapto' ay da'yu.
18At mi'id mahkay di guluh nan babluyyu,
ya mi'id goh di umalin mamatoy ay da'yu.
Ti halimuna' ya ibaliw'u da'yu an umata' hinan allup an mamaliw ay da'yu,
ya dumalat hinan pamaliwa' ay da'yu ya ipabagbagtua'.
19Ya adiyu mahkay mahapul di algaw hi mangipapatal ay da'yuh nan mapatal,
unu adiyu goh mahapul nan bulan an mangipapatal ay da'yuh nan mahdom.
Ti Ha"in an Dios di mangipapatal ay da'yuh mi'id di pogpogna,
ya Ha"in goh di paddungnay benangyu.
20At ta"on hi un mawaday algaw ya bulan ad daya mu adiyu mahapul
ti Ha"in an Dios nongkay di mangipapatal ay da'yuh mid pogpogna.
Ya mapogpog mahkay nan punlungdaanyu.
21Ya maphod ya makulug mahkay di ugaliyun tatagu,
at hakuponyu nan lutah mi'id di pogpogna.
Ya Ha"in di paddungnay mangitanom ay da'yuh di
ta way aton nan anabagbagtu' an mipa'innila.
22Ya nan nahnot an pamilya ya dumo'ol di holagda ta diday ma'al'ali
an umat hinan nidugah di abalinanan himpamabluy.
Ti Ha"in an Dios ya punnaudo' an ipa'annung hitun agtudana.”