Hay Ahumalyaan nan iBabylon
1Hi Apo Dios ya inalinay,
“Da'yun iBabylon ya makak ayuh nan umbunan di ali ta ekayu umbun hinan hupu'.
Manu ti hidin hopapna ya umat ayuh nan babain ma'al'ali,
mu ad ugwan ya numbalin ayuh himbut.
2At anonyu nan inhuhu'yungyu ya nan maphod an lubungyu,
ya indadaanyu nan batun punggilingan ta gilingonyu nan alena.
Ya lihlihonyuy pandelengyu ta bad'angonyu nan wangwang.
3Ti paddungnay mabladan ayu
ta panigtigan di tataguy ipa'ampaanyu ya nan abainanyu.
At nan pangiballoha' hinan ina'inatyu ya mi'id di mangipawa.”
4Ya inali' an hi Isaiah di,
“Nan me'gonan an Dios ad Israel di Baliw tu'u,
ya hay ngadana ya hi Apo Dios an nidugah di abalinana!”
5Ya inalin goh Apo Dios di,
“Da'yun iBabylon ya ekayu umbun hinan way munhehellong an mi'id ahan di lenggop.
Ti nan babluyyu ya adi mahkay mibilang hi un queen hinan abablubabluy.
6Ti impa'abak'un da'yu nan tatagu' ta minolta' didan dumalat di bohol'u.
Mu mi'id ahan di homo'yun dida
ti ta"on hi un nan nun'ala'ay ya nan nun'a'in'inna ya nidugah an pinaligatyu dida!
7Ti hay ninomnomyu ya minaynayun an da'yuy mun'ap'apuh nan abablubabluy,
mu agguyyu ahan ninomnom an hana ya mid mapto' ya mibolloh.
8At hiyanan da'yun hay amlong di pa'appopohdona ya donglonyu tun alyo'.
Ti hay ninomnomyu ya alyonyuy un ayu malenggop hi enggana.
At ipahiyayun alyonyuy,
Mid nipaddungan tun anabagbagtumi,
at adi mabalin hi un ami mabalu unu mun'atoy nan imbabaluymi!
9Mu un himbumagga an un ohay algaw ya mundedehhan an ma'at ay da'yu hana,
at mun'a'atoy nan imbabaluyyu,
ya mun'abalu ayu.
Ya umannung an ma'at an amin hatun da'yu
an ta"on hi un do'ol di atonyu an umat hinan ba'i,
ya madyik,
ya nan udum an abalinanyu.
10Ya enehdolyuh nan nun'appuhin ato'atonyu
ti pangaliyu nin hi un mi'id di mamannig ay da'yu.
Ya dumalat nan ananomnomanyu ya nan anala'engyu ya din'uga' an Dios
ti hay inilayu ya da'yuy na'abbagbagtu an mi'id di nipaddung ay da'yu.
11At palpaliwanyuat ya waday dumatong hi punligatanyu
an mi'id di ologyun mangipadinong ti un himbumagga ya na'at.
12At agayu mahkay ta mumpabadang ayuh nan bululyu
an gunyu nange'kodan an nete"ah din a'ung'ungungngayu
ta olom ya waday ibadangdan da'yu,
ya ta pata'tonda nan buhulyu!
13At baganyun amin nan do'ol an inun'unudyu
an umat hinan nuntugun ay da'yu,
ya nan nanginnilah aat di bittuan,
ya nan gun mangulgu'ulgud ay da'yuh nan ma'at hi abulabulan
ta ibaliw da'yuh nan na'uy an ma'at ay da'yu.
14Mu immannung an unda umat hi ulut an mapuulan.
At ta"on hi un hay odolda ya adida abalinan an baliwan hinan ay apuy an gumiyagiyab
ti adi umat hinan apuy an pun'aniduan.
15At an amin hanan tatagun nange'kodanyu an nete"ah din a'ung'ungngayu
ya taynan da'yu an munhihiyanda,
at mi'id ahan di ohan didah mamaliw ay da'yu.”