Hay Miyadwah Nipa'innilah Amoltaan ad Babylon
(Isa. 13:1—14:23; Jer. 50:1—51:64)
1Hiyah te impa'innilan Apo Dios ay ha"in hi ma'at hinan mun'ohab an babluy hinan pingit di baybay.
Inalinay umat hi aton di alipugpug hi appit hi a'unugan di algaw di aton
nan umalin mangubah ay da'yun malpud Negev an babluy nan mata'tan an tatagu.
2Ya nipa'innilan ha"in nan nidugah an ma'at
ti waday mamalbalih nan iBabylon an dumalat hi apa"ianda.
Ti inalin Apo Dios di,
“Da'yun i'Elam ya iMedia ya ekayu ta li'ubonyu ya ginubatyud Babylon
ti pogpogo' di gunda pangipaligligatan hinan tataguh udum an babluy.”
3Ya nidugah di ta'ot'uh nan tinnig'u ya nan dengngol'un aton Apo Dios,
at dinumgoh di putu' an umata' hinan na'uy an muntungaw.
Ya nonong ya mi'id di bi'ah'u,
at na'ulawa'.
4Ya agguy'u inilay ato' ti wumogwoga' hi ta'ot'u,
at ihihi'al'uy ahdomanana ta molo'a',
mu unat goh nahdom ya un at goh nidugdugah di wimmogwoga' hi ta'ot'u!
5Ya nipattig goh ay ha"in an hidid Babylon ya nidadaan di ma'an,
ya ma'inum, ya na'ap'apan hi ma'ugtul nan dotal an ubunan nan mi'behta.
At hidin ang'angananda ya umanin'inumda ya himbumagga ya waday nuntu'u' an inalinay,
“Da'yun a'ap'apu!
Punlamuhanyuh lanay hapiawyu,
ya nundadaan ayun mi'gubat!”
Hay Ma'ma'at hi ad Judah
6Palpaliwan goh ya inalin Apo Dios ay ha"in di,
“Munhonag'ah umuy mun'adug hinan way pun'adugan hinan bagtun di allup
ta wada ay di tigona ya impa'innilana.
7At wada ay di amangonah numpunlugan hi kalesa,
ya nan nahindudwan numpuntakay hi kabayu,
unu nan dongki,
unu nan kamilu ya mahapul an hamadonan tigon di atonda.”
8At palpaliwan ya muntu'u' nan mun'adug an inalinay,
“Apu, abigabigat ya amahdomahdom ya wagwadaa'
hinan pa"ata'nang an abung an pun'adugan.
9Mu ad ugwan ya un'u amangon nan numpunlugan hinan kalesa,
ya nan nahindudwan numpuntakay hinan kabayu!”
Ya nuntu'u' goh an inalinay,
“Na'abak mahkay ad Babylon!
At an amin nan bululda ya nun'agimu',
at niwa'at hinan luta!”
10At inali' di,
“Da'yun i'ibba' an iJudah an nipaddung hinan na'elek an paguy
ya ibaga' an amin ay da'yud ugwan nan dengngol'un
inalin nan nidugah di abalinanan Dios tu'un holag Israel.”
Hay Nipa'innilah Amoltaan ad Edom
(Jer. 49:7-22; Ezek. 25:12-14; 35:1-15; Am. 1:11-12; Obad. 1:1-21)
11Hiyah te goh di nipa'innilah ma'at hi ad Edom.
Palpaliwan ya dengngol'u han mun'ali ay ha"in hi ad Dumah an inalinay,
“He"an mun'adug, undan ahup ya un mawa'ah?”
12Ya tembal'un inali' di,
“Na'uy an mawa'ah,
mu awniat mahdom goh damdama!
At gulat ta pohdom an mahmahan ya agam ta munhanhan'a ta awni ya un'a goh umali.”
Hay Nipa'innilah Amoltaan ad Arabia
(Jer. 49:28-33)
13Hiyah te goh di impa'innilan Apo Dios hi ibaga' hinan i'Arabia. Inalinay,
“Da'yun iDedan an gun mumbaat
ya mungkampu ayuh nan mapulun hinad Arabia.
14Ya da'yun numpunhitud Tema ya pa'inumanyu nan i'ibbayun nun'a'uwaw,
ya pinanganyu nan nanaynan hi babluyda.
15Ti unda inlayawan nan pumatoy an numpangdon hi hanggap,
ya pana,
ya an amin nan nidugah an ma'at hinan punggugubatan.”
16Palpaliwan goh ya inalin Apo Dios di, “Mala'uh di hintawon ya mapogpog mahkay an amin di a'e'gonan ad Kedar hi ad Arabia. 17At unda tuttuluy ma'angang hinan tindalud Kedar an nun'ala'eng an pumana. Ha"in an Dios an gunyu dayawon an holag Israel di nanapit ete.”