Nan Kantan Pundayaw ay Apo Dios
1Awniat madatngan di pangikantaan nan tataguh tun ad Judah eten kantan alyonay,
“Nahamad tun babluy tu'u ti hi Apo Dios di mangibaliw ay ditu'u,
at mipaddung hinan allup an nunle'woh ay ditu'u.
2At ibughulyu nan pantaw hinan allup
ta humigupdan amin nan tatagun manginaynayun hi pangulugdan Apo Dios
an dida nan imbilangnah nahamad di pangatda!
3Ti hi Apo Dios ya palenggopona nan tagun na'na'unnud ay Hiya
ti Hiyay edenolna.
4At hi Apo Dios di pange'kodan tu'uh enggana
ti Hiya nan paddungnay daplah an ihi'ugan tu'u ta mibaliw tu'u.
5Hiya ya ipa'ampana nan mumpahiya,
ya pa"iona nan ma'al'alin babluyda
ta mun'egday nan allupda ta midipat hinan luta.
6At pun'igatin nan nun'awotwot,
ya ma'abohlan an tatagu.
7Mu nan na'na'unnud ya pundotalon nan nungngadan hi Nahamad di Pangatnay dalanonda
ta maphod hi owonda.
8At da'mi ya pohpohdonmin hi Apo Dios di mipabagtu,
at unudonmi nan Uldina,
ya Hiyay edenolmi.
9At abigabigat ya Hiyay nonomnomonmi.
Ti wa ay ta moltaona nan tataguh tun luta ya hiyay panginnilaandah
nan nahamad hi un'unudonda ta ipogpogda nan nun'appuhin ato'atonda.
10Mu ta"on damdamah unmu ipattig di homo'muh nan nun'appuhiy pangatdan tatagu
ya adida damdama matuduwan an mangat hi maphod.
Ya hihidyan nan nun'appuhiy gunda aton an ta"on hi unda wah nan babluy
an hay nahamad di mitudtuduh ma'unud
ti adida pa"immatun hinan anabagtum an Dios.
11Ya ta"on goh hi un'a nundadaan an mummoltan dida
ya paddungnay unda nabulaw an nangohoyda.
At ipattigmun didan buhulmu an He"a ya ongol di pamhodmun da'min tatagum ta mabainanda.
At moltaom,
at didah nan apuy an inalim hi pamogpogmun dida.
12Apo Dios, iyabulutmu ni' an lumenggop ami
ti dumalat nan abalinan an nalpun He"a
ya mun'aphod di inatmi.
13Apo Dios an Diosmi,
wadaday udum an nun'ap'apun da'mi,
mu He"a damdama ya anggay di dayawonmi.
14Ya danen nun'ap'apun damih din hopapna ya minoltam dida,
at nun'atoyda
at na'aliwandah nabayag.
15He"a, Apo Dios, ya impado'ol da'min tatagum,
ya impa'ambilogmu tun numbabluyanmi.
At hiyanan He"ay daydayawonmi.
16Hidin nangilatam ay da'mi, Apo Dios, ya nidugah di nipaligligatanmi,
at numpahpahmo' amin He"a.
17Ti umat amih nan babain magadyuh muntungaw
an pumkaw hi dogoh di puntungawana.
18Mu ta"on hi un ami nunligligat ya agguymi inabalinan an nangibaliw hi babluymi,
ya bo'on hiyay dumalat hi pinumhodan nan tatagu.
19Mu inilamin He"a ya abalinam an mamaliw ay da'mi
ya tun babluymi tuwalin paddungnay mahuam!
At awniat ikankantan nan tataguy amlongda
ti nan panaguam ay da'mi ya mipaddung hinan dulnuh nan helhelong.
20At da'yun i'ibba' an holag Israel ya edenolyun Apo Dios an paddungnay umanamut ayu,
ya nun'ida'igyuy abungyu ta mipo"oy ayuh engganay un ma'udyaan di bungotna.
21Ti umalin malpud abuniyan ta moltaona nan tataguh tun lutan dumalat di baholda.
Ya inilan Apo Dios an amin nan tatagun napatoy hi abablubabluy,
ya inilana goh nan tatagun namatoy ay dida,
at hiyanan mamoltada.”