Nan Munnanannong an Lenggop
1Hiyah te goh di impa'enap Apo Dios ay ha"in an hi Isaiah an hina' Amoz hi aat di ma'ma'at ad Jerusalem an kapitulyu ya nan udum an babluy hitun ad Judah.
2Ti udum di algaw ya muntembag heten me'gonan
an awadan di Timplun pundayawanyun Ha"in.
At mumbalin hi na'abbagbagtun duntug ya un nan udum an aduntuduntug,
at nan tataguh abablubabluy ya umalidan mundayaw hitu.
3Ti do'ol di mangalin diday,
“Ma ayu ta umuy tu'uh nan duntug an pundayawan ay Apo Dios
an awadan nan Timplun nan Dios an dayawon di holag Jacob!
Ta wan ituduwan ditu'un mangat hi pohdona ta Hiyay unudon tu'u.”
Umat hinay alyonda ti henen gutud ya ad Jerusalem mahkay
di alpuwan nan Uldin Apo Dios an mitudtuduh nan tatagu.
4Ya hi Apo Dios goh di mangipanuh hi an amin an adi pun'u'unnudanan di tataguh abablubabluy,
ya mapogpog mahkay di gubat.
At nan almas hinan gubat an umat hi hanggap ya bohalonda mahkay ta mumbalin hi aladu,
ya nan pahul ya pumbalinondah kumpay
ta pamutuldah nan pahalepengondan inhabalda ta maphod di bumungaanda.
Ya adi ahan mahkay mun'adal hi aton an mi'gubat.
5At hiyanan ditu'un holag Jacob
ya nomnomon tu'u ta nan pohdon Apo Dios di aton tu'u!
Hay Panumalyaan Apo Dios hinan Tatagu
6Ya nunluwalua' an inali' di,
“Apo Dios, din'ug da'min tatagum an holag Jacob
ti gapu ta hay un'unudonmi ya nan layah an tudtudun di tatagun nalpuh appit hi buhu'an di algaw.
Ya nundenol ami goh hinan mumpumba'i an umat hi pangat nan iPhilistia,
at inyunnudmih nan pangat di tataguh udum an babluy.
7Manu ti adangyan tun babluymid Judah hi silver,
ya balitu',
ya nan udum an nun'abalul an batu,
ya do'ol goh di kabayumi,
ya kalesan di titindalun umuy mi'gubat.
8Mu do'ol hitun babluymiy bulul hi numbalinondah diosda,
9at hiyay gapunah ipa'ampaanmi,
at nidugah di abainanmi.
At He"ay way biyangnan adi mangaliw hinan baholmi.”
10Ya innayun'un inaliy,
“Da'yun tatagu ya ekayu mun'ipo"oy hinan daplah hinan liyang
ta ipadahyun ilayawan nan nidugah an ma'at
an dumalat di bungot Apo Dios,
ya nan ongol an abalinana,
ya anabagtuna.
11Ti awniat madatngan di apogpogan nan mumpumpahiyan tatagu
ta hi Apo Dios ya anggay tuwaliy midaydayaw.
12Ti hi Apo Dios an nidugah di abalinana
ya ipa'ampana nongkay nan mumpumpahiyan way abalinandan tatagu.
13Ya nan o"ongol ya adudu"oy an ayiw an cedar ad Lebanon
ya nan ayiw an oak hi ad Bashan ya bu'nutona.
14Ya pundotalona nan atata'nang an duntug
ya nan dudunduntug,
15ya numpa"ina goh nan atata'nang an abung an pun'adugan di tindalu
ya nan nun'ihamad di allupnan babluy.
16Ya pumpa"ina nan pupul hi ad Tarshish
ya nan mun'aphod an bangka.
17Ta way aton nan mun'abungot ya mumpumpahiyan mipa'ampa ta mabainanda
ti hi Apo Dios tuwali ya anggay di me'gonan an madayaw.
18Ya mami'id mahkay nan abulubulul an numbalinondah diosda.
19Ya hay pangipa'alyogan Apo Dios hitun luta ya umuy mun'ipo"oy nan tataguh
nan liyang unu hinan na'uhu' hinan luta
an dumalat nan nidugah an ta'otdah nan nunheglan bungotna,
ya nan ongol an abalinana,
ya nan anabagtuna.
20Ya henen a'atana ya pun'itapalda mahkay nan bululda
an balitu' ya silver hinan ayda nun'ipo"oyan an abung di bu'at ya littalit.
21Ti mumpangalayawda nongkay nan tatagu
an umuyda mun'ipo"oy hinan daplah ya hinan malgom an liyang
an dumalat di ta'otdah nan nunheglan bungot Apo Dios ya nan anabagtuna.
22At hiyanan adi tu'u edenol hi tagu.
Ti undan way abalinanda?”