Hay Ipaligligatan nan iJudah
1Anakkayah an na'uy mahkay
an mi'idon nan nidugah di abalinanan Dios di mahapul tu'u an ma'an ya danum
hitun ad Jerusalem ya hinan udum an babluy hitun ad Judah!
2Ya ta"on hi un nan a'ap'apu,
ya nan titindalu,
ya nan gun mangipanuh hi tatagu,
ya nan propeta,
ya nan mumbuyun ay ditu'u ya mi'idona.
3At mi'idona nan a'ap'apun di nabonglen titindalu,
ya nan ap'apun di gubilnu,
ya nan u'upihyalda.
ya nan wada nongkay di abalinana,
ya nan mangibaag hinan ma'ma'at.
4Ta hay ihukat Apo Dios hi mun'ap'apu ya nan ungungan manangpah.
5At nan tatagu ya mumpapahhalanda an ta"on hi unda nuntutunglub,
ya adi e'gonan nan ungungay mina'ilog.
ya ta"on un nan nun'a'ampan tatagu ya ngohoyonda nan nun'abagtuy haadda ya un dida.
6Ya heden a'atana ya nan hina"ama ya nonongan impa'ud di ohay agina ya inalinay,
“He"ay way lubungnan ditu'u,
at he"ay mangipangpanguluh tun napa"in babluy tu'u!”
7Mu tabolonan alyonay,
“Adi mabalin ti mi'id di mabalin hi ibadang'un da'yu!
Ti ta"on hi un hay abungmi ya mi'id di ononmi,
ya mi'id di lubungmi.
At adi mabalin hi un ha"in di mangipangpangulun da'yu!”
8At ma'ubah tun ad Jerusalem ya an amin tun ad Judah
ti ma"attig hinan panapitda ya pangatda an ngohoyondah Apo Dios
ya nan anabagtuna.
9Ya ta"on hi un nan angahda ya ma"attig di numbaholanda
ti mi'id ahan di bainda an mangipattipattig hinan pangatdan nun'appuhin umatdah din iSodom.
Mahmo'da ahan ti mamoltada,
mu diday ad bahol.
10Mu nan tatagun nahamad di pangatda ya malenggopda
ti maphod di panganandah nan nanablayanda.
11Mu agogohgoh nongkay nan tatagun mangamangat hi nappuhi
ti miballoh ay dida nan ina'inatda!
12At mahmo' ayu ahan an i'ibba ti awniat nan ungungay mamalpaligat ay da'yu,
ya nan binabaiy mun'ap'apun da'yu.
At dumalat nan nibahhaw an itududah atonyu ya mibahhaw ayuh nan nahamad an ma'unud,
at mid papto'ananyu.
13Ya hi Apo Dios an nabagbagtu
ya nundadaan an manumalyan ditu'un tatagu.
14At pahhunona nan a'ap'apu ya nan mumpangipangpanguluh nan tataguna ta alyonan diday,
“Da'yuy numpama"id Judah an paddungnay nuntanoma' hi greyp
ta pinnuyuy a'abungyuh inakawyuh nan nun'awotwot!
15Mi'id ahan di biyangyun mangipaligligat hinan tatagu'
ya mamalbalih nan nun'awotwot!
Ha"in an nidugah di abalinanan Dios di nanapit ete.”
Hay Ma'at hinan Binabaid Jerusalem
16Inalin goh Apo Dios di,
“Tigonyu nan binabain iJerusalem
an wa ay ta mundaldallananda ya ayda mamain ti mumpahiyada.
Ya nun'ahu'luban di hu'idah ahikekeleng hi unda dumalan,
at ma"attig an mi'linala'ida an mi'id di baindan manged'eked'eng hinan linala'i.
17At hiyanan moltao' dida ta mun'abungulan di uluda,
ya mun'a'gah di buu'da ta mamukmukanda.
18Ya mi'ido' an amin nan pun'alkusdah odolda an umat hi buung, ya hingat, ya padang, ya nan alkus di buu', 19ya ganeleng, ya nan lo'ob an mihophop hi ulu, 20ya nan uklup, ya balikis, ya nan bangbanglu, ya nan pangagay'ayda. 21Ya ma'aan goh nan henghengda, ya hingat di olongda, 22ya nan mun'aphod an mun'agayad an lubungda, ya pitakada, 23ya daggalda, ya nan linen an panyuda, ya nan hophop di pu'olda, ya nan adu"oy an hu'yungda.
24Mu mumbalin din nabanglun hunghungdah mun'agub,
ya mumbalin din maphod an balikisdah tali.
Ya mun'a'agah din maduyuh an buu'da ta mamukmukanda nongkay,
ya din mun'aphod an lubungda ya mumbalin hi langgut,
ya din amaphod di tigawda ya mumbalin hi bilabilat di pogha.
25Ya nan linala'i ya mun'a'atoydah gubat
an ta"on hi un nan mun'abi'ah an mi'gubat.
26Ya mun'atu"in nan pantaw di allup ta mipaddung ad Jerusalem hinan babain nabladan
ta mumpunlungdaya ya mumpangakila nan tatagu.