Hay Nangalyan nan Propeta an Mamolta nan Tatagun Dumalat di Baholda
1Ya ninomnom'u an hi Isaiah an wagwadah Apo Dios an gun ditu'u baliwan,
ya dodonglona goh nan luwalu tu'u.
2Mu adi umat hina ti nan baholyuy namattan ay da'yuh nan Dios tu'u,
ya hiya goh nan'uganan ditu'u,
at hiyanan adina dongdonglon mahkay di luwaluyu.
3Nan ngamayyu ya paddungnay un nadadala,
ya limmayalayah ayu,
ya nan nun'appuhiy malpuh timidyu,
at nabaholan ayu.
4Ya nidugah ayu ti ta"on hi un nan punhumalyaan ya mi'id di makulug
hi hapitonyun tatagu an ahilalayah ayun amin.
At layah di pangabakanyuh diklamu,
ya hay gun mipanomnom ya nan pangatanyuh nappuhih ibbayu
ta engganay un ma'at nan ninomnomyu.
5Nan nun'appuhin ato'atonyu ya umat hinan itlug di ulog an waday habidungna.
Ti wa ay di mangihdah nan itlug di ulog ya matoyda,
mu wa ay ta mapah at umongol, ya umalat.
6Mu hanan nappuhin ninomnomyu ya mi'id di idatnah pumhodanyu
an umat hinan buut di a'agwa an mi'id di hulbinah un ilubung.
7Ti dumalat nan nun'appuhin gunyu nomnomnomon
ya umi'ikay ayu goh udot an mangat.
Ya ta"on hi un mi'id di bahol nan tagu ya patayonyu,
ya wa ay goh di umayanyu ya malgom di pumpa"iyu.
8Ya wa ay goh ta wada ayu ya mid di pohpohodna
ti nan nun'appuhin amin di gunyu aton
an paddungnay un nan nappuhin dalan di unudonyu.
At nan tagun mange'wan ne ya mi'id di lenggopna.
Hay Nangabulutan nan Tataguh Baholda
9At ha"in an hi Isaiah ya impangulua' an nunluwalu
ta imbaag'uy nangabulutanmin tataguh baholmi an inali' di,
“Apo Dios, ad ugwan ya inilami mahkay di dumalat
hi adim pamaliwan ay da'mih nan mangipaligligat ay da'mi!
At paddungnay wada amih nan helong,
mu hay hehemmonmi ya mapatalan ami.
10At hiyaat un ami ay nun'abulaw an ahi'ap'apu'ap
an ta"on hi un mapatal ya mihungbub ami
an paddungnay un hehellong an mi'id di tigonmi
an paddungna goh hi un ami wah nan hehellong an awadan di nun'atoy.
11Ya umat ami goh hinan animal an bear an mun'alawaaw,
ya munlungdaya amin umat amih kalapatin muntapang hi ibbana.
Ya ta"on hi un nan namnamaonmi goh an maphod hi ma'at ay da'mi ya adi ma'at,
ya hohoddonmi goh di pamaliwam ay da'mi,
mu mi'id an adim aton.
12Nidugah ahan di numbaholanmin He"a, Apo Dios,
an hiyay dumalat hi pamoholam ay da'mi!
Mu hatun nun'appuhin ina'inatmi ya immannung an abulutonmin nibahhaw ami.
13Ya inilami goh an binoholmi He"a, Apo Dios,
ya pinahiwmi He"a ti agguymi inunud nan pohdom,
ya din'ugmi He"a.
Ya immannung an impaligligatmi nan udumna an tatagu,
ya layah an amin nan hinapitmi.
14Ya nan agguy immannung di pumpanuhmi,
ya nan adi makulug di atonmi.
Ya adimi goh haghaggungon nan immannung an na'at.
15Ya napogpog mahkay din makulug
ti nan agguy nangat hi nappuhi ya diday pabaholondah nan nun'appuhin na'at.”
Hiyah ne inluwalumi.
Ya la'tot ya tinnig Apo Dios hanan na'na'at ay da'mi,
ya adi ahan umamlong hinan nun'appuhin na'at.
16Ya manoh'ah nannigana an mi'id ah ohah mamadang hinan mipaligligat.
Mu baliwan ditu'u ta way atondan mangabak.
17Ya paddungnay ilubungna nan na'ahhamad an pangat ta hiyay hanin di palagpagna,
ya nan abaliwan di paddungnay iyuklupna ta hanin di uluna.
Ya paddungna goh hi unna ilubung di nahamad an punnomnom
ta iballohna nan nun'appuhin hinolholtap tu'u.
18Ya moltaona nan buhulna an hay pummoltana ya miyunnud hinan inatda,
ya ta"on goh hanan numpunhituh nan nunlene'woh.
19Ya mete"ah nan buhu'an di algaw hi engganah alimuhana
ya ita'otda nan amaphod Apo Dios.
Ti umalin umat hinan mabi'ah an datong ya puo'.
20Ti inalin Apo Dios di,
“Umalia' ad Jerusalem
ta baliwa' da'yun nuntutuyun nan'ug hinan baholyu!”
21Ya inalin goh Apo Dios di, “Mi'tulaga' ay da'yu ta miyodol nan Na'abuniyanan an Lennawa ta nan intudtudu' ya adiyu al'alliwan hi enggana. Ya mete"ad ugwan ya Ha"in di unudonyu, ya ituduyuh nan imbabaluyyu ya nan holag di a'apuyu ta Ha"in di unudondah enggana.”