Nan Dayawon nan iBabylon
1Nan dayawon nan iBabylon an da Bel ay Nebo ya nittudah kalesa ta guyudon di baka.
Mu nidugah an madamotda,
at maligatan nan animal an manguyud.
2Ya danen bulul ya nan animal an manguyud ay dida ya makakdad Babylon,
at iyuy di buhulda didah udum an babluy ti mi'id di abalinandan mangibaliw.
3At hi Apo Dios ya inalinay,
“Donglonyu tun ibaga' ay da'yun na'angang an holag Israel.
Ha"in ya limmu' da'yu,
ya hinalimuna' da'yun nete"ah din nitungawanyu.
4At engganah un ayu ma'alla'ay ya mun'a'ubanan ya Ha"in damdamay manalimun ay da'yu.
Ti Ha"in nongkay di nunlumu, ya mangipapto', ya mangibaliw ay da'yu,
5Undan waday udumnah pangipaddunganyun Ha"in?
Ti undan way nipaddunga'?
6Nan udumna an tatagu ya pun'ibu'yagday balitu'da ya silverda,
ya ipiyammadah bulul hinan tatagun pabo'laanda ta way punhippiandah dayawonda.
7Ta nalpah ay ya impi'ugdan iyuy hinan lugal an inyammadah ihinanda,
ya inhamaddan ipata'dog hidin adi mihmihlig.
Ya ta"on hi un kumila nan munluwalu an mumpahpahmo' ya adina tobalon
ti mi'id di abalinanan bumadang.
8At hiyah te nomnomnomonyu
an da'yun nun'abaholan an tatagu,
9ya adiyu goh aliwan din ina'inat'u an nete"ah din hopapna.
Ti Ha"in nongkay ya anggay di Dios an mi'id di udum.
10Ya hidin nadnoy ya nannahhun tuwalin impa'innila' di ma'at ya un mahkay ten ma'at.
Ti din inali' hi ma'at ya mipa'annung an adi ahan mibahhaw.
11At hay ato' ya ayaga' han lala'in niyadagwiy alpuwanah appit hi buhu'an di algaw,
at umali ta hiyay umat hinan gayang an himbumagga ya nun'ohop
ta atona nan ninomnom'un ma'at.
At makulug an adi mibahhaw an ma'at.
12At da'yun ma'angohhoy an tatagun nidugah an nappuhiy pangatna
ya donglonyu tun ibaga'
13ti Ha"in ya adi madnoy at ipaphod'u da'yu.
At ibaliw'u da'yun iJerusalem an holag Israel.”