Hay Pummoltaan Apo Dios hinan Tataguh Abablubabluy
1At da'yun amin an tataguh nan abablubabluy
ya ma'amung ayu ta donglonyu tun alyo'!
2Ti hi Apo Dios ya nidugah di boholnah an amin an tataguh abablubabluy
an namamah nan titindaluda,
at hiyanan ipapatoyna didan amin ta hiyah ne moltada.
3At umayuh di daladah nan aduntuduntug,
ya adida milubu',
at nidugah di agubda.
4Ya an amin nan bittuan hi ad daya ya magahdan
umatdah nan na'leng an tubun di greyp, unu fig, unu bungan di ayiw.
Ya mali'up ad dayan umat hinan nali'up an pepel.
5Ya inalin goh Apo Dios di,
“Tun hanggap'u ya enelpahnan pinogpog an amin nan wad daya,
at ten ebaweng'ud Edom ta engganah unda matoy an amin nan tatagun wah di eden babluy.”
6At nan hanggap Apo Dios ya malamuhan hi dala ya taba
an paddungnay dala ya taban di kalnilu ya gandeng an ne'nong ay Hiya.
Ti patayonay do'ol ahan an tatagud Edom
ta paddungnay un immuy nun'onong hi ad Bozrah hidid Edom.
7At numpatoyna nan ongol di abalinandan a'ap'apu ya linala'in mumpangilog
an paddungnay pa"ilog an baka ya o"ongol an manilhig an baka.
At etmog nan lutay dalada ya tabada.
8Ti hi Apo Dios di ad nomnom
an hiyah ne pangiballohanah nan inat danen i'Edom ay ditu'un holag Israel.
9Ya nan danum hinan numbino'ob'on an ginnaw hi ad Edom ya mumbalin hi aspalto an mangmangitit,
ya nan hupu'da ya mumbalin hi budbuda an dumalang
ta moghob an amin heden babluy.
10Ya adi madmaddop,
at umahu'ahu'.
At mete"an de ya minganuy an adi mababluyan hi enggana,
ya mi'id ahan di umuy hidin munle'le'od.
11At un pumbuyaan di tu'u'an, ya kuup, ya nan udum an hamuti
ti iyabulut Apo Dios an minganuy heden babluy ta matawan hi enggana
12ti mi'id mahkay di mun'ali,
ya an amin nan a'ap'apuh di ya mapogpogda.
13Ya mumpango"ongol di pagat ya gulun hinan abung di ap'apu ya nan allupda,
at hay mihina nongkay hidi ya nan hamuti ya nan ma'alih jakal.
14Ya ta"on un nan animal hi inalahan ya hidiy ihinanda,
ya wah dida goh di gandeng hi inalahan an ahingengeewdah di.
Ya hidi goh di olo'an nan animal an nan mahdom di punle'le'danda.
15At hidiy pumbuyaan di tu'u'an hi engganay mapahda,
ya impapto'na didah di ta engganah umongolda.
Ya hidiy a'amungan nan o"ongol an hamutin madugwadugwa.
16At ma'at hanad Edom ta wa ay di mumbaha eten Liblun Apo Dios,
at innilaonda mahkay an mi'id di ta"on hi ohan date hi mami'id,
ya way ohan dida goh ya waday pi'yibbada.
Hiyah ne inalin Apo Dios hi ma'at,
at nan Na'abuniyanan an Lennawa ya ipa'annungnan amungon dida.
17Ti hi Apo Dios di mangipiyuy ay danen animal hinan ihinandah mid pogpogna.