او هُداوند! بادشاها سۆب و پێرۆزی بدئے
په سازگر و وشآوازانی سالارا. داوودئے زَبور.
1هُداوند ترا سکّی و سۆریانی رۆچا پَسّئو بدئیات،
آکوبئے هُدائے نام ترا نگهپان بات.
2چه وتی پاکێن جاگها په تئو کُمک برسێنات و
چه سَهیونا ترا مَدَت کنات.
3تئیی سجّهێن کُربانیگان وتی یاتا بدارات،
تئیی سۆچگی کُربانیگانی مَنّۆک بات. اۆشت...
4تئیی دلئے واهگان برجاه دارات و
تئیی سجّهێن شئوربندیان کامیاب کنات.
5تئیی سۆب و پێرۆزیا گۆن شادمانی کوکّار بکنێن و
وتی بئیرکا تئیی نامئے سرا بُرزاد بچنڈێنێن.
هُداوند تئیی سجّهێن دَزبندیان پوره و سَرجم بکنات.
6نون زانتُن که هُداوند وتی رۆگن پِر مُشتگێنا رَکّێنیت و
چه وتی پاکێن آسمانا آییا پَسّئوَ دنت،
گۆن وتی راستێن دستئے رَکّێنۆکێن واک و تاگتا.
7لهتێن وتی اسپ و اَرّابهانی سرا پَهرَ کننت،
بله ما وتی هُداوندێن هُدائے نامئے سرا پَهرَ کنێن.
8آ سرێنپرۆشَ بنت و کپنت،
بله ما پادَ کاێن و مُهرَ اۆشتێن.
9او هُداوند! بادشاها سۆب و پێرۆزی بدئے.
تئوار که کنێن، مئے پَسّئوا بدئے.