1Madayaw hi APU DIOS.

Dayawon yuh APU DIOS, dakayun wadad tap-oh kabunyan. 2Dakayun anghel ya dakayun tindalunan wadah di, dayawon yuh APU DIOS.

3Dayawon yuh APU DIOS, dakayun algo, bulan ya bibittuwon. 4He-an kabunyan* an nakattag-e ya dakayun danum an wadah di, dayawon yuh APU DIOS.†

5Dayawon yuh APU DIOS, dakayun am-in an lintuna. Ammunay kalina ya nawada kayu. 6Ot imandal nay pinhod nan kiha-adan yu ta nangamung ot naat. Hidiyen immandal na ya adi malumman.

7Ya dakayun wadah luta ya baybay, takon di dakayun wadad daloddalom, dayawon yuh APU DIOS. 8Dayawon yuh APU DIOS, dakayun kil-at, dalalu, kulabut, puwok ya dibdib an makangngun-unud hi kalyona.

9Takon di dakayun bibilid, duduntug, kakaiw an makan di bunga na ya dakayun mumuyung, dayawon yuh APU DIOS. 10Dakayu damdaman mailom ya naayum an aaggayam, dakayun uulog ya hahamuti, dayawon yuh APU DIOS.

11Dakayun papatul, dakayun am-in an tatagu ya dakayun aap-apu, ya dakayun huwes, dayawon yuh APU DIOS. 12Dakayun kat-agun binabai ya linalaki, aam-ama ya iin-ina ya u-unga, dayawon yuh APU DIOS.

13Om, am-in kayu ya dayawon yuh APU DIOS. Hiyay Katagtag-ayan hi am-in. Paddungnay lina-uwan di dayaw nay luta ya kabunyan. 14Tinuddun APU DIOS di pumpatul nadan tatagunan holag Israel ta matbal dan am-in.

Madayaw hi APU DIOS.