1APU DIOS an Ap-apu mi, hay kinatag-em ya makattibon am-in tuh luta. Ya hay dayaw mu ya maid di kiingngohanad kabunyan.

2Takon di u-unga ya goggolang ya natuttuduwan hi maphod an pundayaw ke he-a.* Ya gapuh ongal an kabaelam ya nalakan apputom nadan buhul mun mungngohen he-a.

3Deket intangad ku nah lintum an kabunyan ta tinibok nan bulan ya nadan bittuwon an inha-ad mu nah kiha-adan da 4ya mipanomnom an hay tagu ya nababa, yaden tipet pakannomnomom ya paka-ippaptok mu dida? 5Lintum didan nababbaba mu he-a,† ya ongal di nangipadayawam ke dida. 6Diday impun-ap-apum am-in hanadah lintum,‡ 7umat nadah kalnero, baka, nadan udum an aggayam, 8hamuti, dolog ya am-in nadan wadah baybay.

9APU DIOS an Ap-apu mi, makulug an hay kinatag-em ya makattibon am-in tuh luta.