1APU DIOS, donglom anhan di dasal kun mumpahpahmok ke he-a. 2Om, donglom anhan di dasal kut adiyak baybay-an nah kabulubulunak ya adim anhan baybayaggon di pamaddangam ke ha-on.

3Paddung nay ahuk di biyag kun mungkama-id ya mun-aatung di gunit kun kay apuy. 4Mungkakuugak mo anhan an umatak nah mungkamag-anan an holok. Nip-ot bo te humigaak an abun mangan. 5Hay adol ku ya numbalin hi kay gunit ot mablatan. Ya pumalapalakak. 6Umatak bo nah mailom an hamuti nah adi maboblayan ya umatak nah bulayyu nah niwalong an boble. 7Mibakbakillangak ya umi-ingleyak an umatak nah naoh-ohhan buding hi atop. 8Panadngolanak hi buhul kuh kabigabigat ya tanaltalanggaanak ya usalon day ngadan kun pun-idut.

9Paddungnay mangmangnganak hi dap-ul ya paddungnay in-innummok di luwak 10te gapuh namahig an boh-ol mu ya paddungnay inweleyak. 11Hay biyag ku ya umat nah a-oh mungkahilong an gagalan mama-id ya umat nah holok an makleng.

12Mu he-a, APU DIOS ya munnanong kan mumpatul ya mundingngol kat nangamung. 13Nunna-ud an umina kat ipatibom moy homok muh tatagud Jerusalem. Om, ad uwaniy ustuh tiempon pangipatib-am di homok mun dida. 14Dakamin muttatyum ya pakappinhod mih tuwen boble, takon di nadadag. Ya mahakit di nomnom min mangang-ang hi nadadagana.

15Tumakut di tataguh kabobboble ke he-a, APU DIOS. Ya am-in di papatul ya takutan da nan ongal an kabaelam. 16Mipatiboy dayaw muh pangiphodam hi Jerusalem. 17He-a ya donglom uppey dasal nadan makakkahmok an tatagum.

18Itudok yuy inat APU DIOS ta dayawon nadan ahi mitun-ud an iimbabale taku. 19Athituy itudok yu: “In-uhdung APU DIOS an wadah langit 20ot donglonay palak nadan balud ot ibukana nadan nagtud di kipipatayan da.” 21Ta mundingngol ya midayaw di ngadanad Zion ad Jerusalem 22nah kaamungan nadan tatagunan mundayaw ke hiya.

23APU DIOS, impumbalinak ke he-an nakakkapuy ta matikkey biyag ku yaden kat-aguwak pay ni-an. 24Ot mundasalak ke he-an kanak di “Apu an Dios kun wadat nangamung, adim anhan poppogon di biyag ku te kat-aguwak ni-an. 25Handih lappuna ya lintum di luta, hay kabunyan ya am-in nadan wadah di. 26Ya ahida mama-id te umat dah bulwatin mumbalin hi layut, mu he-a ke ya wadawada kat nangamung. Te ahim kaanon datuwen lintum ta hannotam didah balu. 27Mu he-a ke nimpe ya adika mumbaliw, mu munnananong kat nangamung.* 28Ahi malinggop di iimbabalen nadan tatagum, takon nadan inap-apu da te ipaptok mu dida.”