1Hi Apu Dios di kihikugan taku ya hiyay mangipal-ot ke ditaku. Wadat nangamung an bumaddang ke ditaku nah tiempon mabulubulun taku. 2Ta hidiye nan adi taku tumakut, takon di mungkadadag di lutan magdey bibilid an mange dah baybay 3ya takon di umolwang ta mianud di pangngel di bibilid.

4-5Mu hay Jerusalem ya adi madadag te wadah dih Apu Dios an Katagtag-ayan an mun-adug hidi. Hanadan numbobleh di ya umamlong dat nangamung. Ya hidiyen amlong dan malpun hiya ya mialig nah wangwang an adi matduk. 6Mu nadan tataguh kabobboble ya tumattakut da te naapput di pun-ap-apuwan da ya deket kimmalih Apu Dios ya namam-an kay da mateh takut da.

7Mu hi APU DIOS an Kabaelanan am-in an Dios damdaman Jacob ya wadan ditaku ta hiyay kihikugan taku.

8Nomnomon taku nadan umipamodwong an inat APU DIOS an nanadag nadah pun-ap-apuwan hituh luta. 9Patikodonay gubat takon di daana. Ya pa-iyonay pahul ya pana ya gobhona nadan happiyo.

10Kalyon APU DIOS ke diday “Dumin-ong kayu! Nomnomon yu an ha-oy ya abuy Dios an Katagtag-ayan an Ap-apu, takon di daana tuh luta.”

11Hi APU DIOS an Kabaelanan am-in an Dios damdaman Jacob ya wadan ditaku ta hiyay kihikugan taku.