1-2Dakayun am-in an tataguh kabobboble tuh luta, kadangyan weno nawotwot, natag-e weno nababa, donglon yuh tuwe: 3Te kumaliyak hi kalin di nanomnoman ta maawatan yuy ine-en di biyag. 4Ya iesplikar kuy kibalinan di donglok an kalin di nanomnoman yaden mun-ay-ayyudingak.

5Adiyak tumakut nah tiempon waday katatakut an maat takon di linikkubak hi buhul ku* 6ya gaga-ihon tatagun mundinol ya mangipahhiyah kinadangyan da. 7Muden maid di tagun kabaelanan mangihwang hi adol na† weno bayadanay biyag na ke Apu Dios. 8Hay kihwangan ya adi nalaka, kinali maid di ohan tagun ena kabaelan an bayadan di biyag nat 9munnananong an matagun adi mate.

10Maten am-in di tatagu takon di nalaing ya nanomnoman weno makudang di nomnom nat itayan day limmu dah udum an tatagu. 11Ta hanan lubuk day punhituwan dat nangamung. Ya man-ut nungkingadan di ngadan dah lutada, mu taynan da metlaing dadiyet ibagin di udum an tatagu. 12Te takon di kadangyan di ohan tagu ya adinadaman hidiyey mangihwang ke hiyah kate. Ahi metlaing maten umat hi aggayam.

13Athidiy maat nadah tatagun mundinol hi adol dan makallinggop da gapu te kadangyan da.‡ 14Ahida umat nah kalneron matet paddungnay katey mangiadug ke dida. Ya mabuluk di adol dah lubuk an nidawwi nah makapkaphod an baleda. Hituwey kitib-anan nunna-ud an ahi madatngan di algon paddungnay apputon nadan makangngun-unud ke Apu Dios dida. 15Om, maapput dadiyen tatagu, mu ha-oy ke pe ya ihwangak ke Apu Dios hi kate.

16Kinali, adi ad-adiy punnomnom yu hin kumadkadangyan day gaga-ihon tatagun mungkaongal ya mungkiphod di babale da. 17Te maid di al-alan da ten mate da, adi maki-ey kinadangyan dah lubuk da. 18Man-u te makaphod di biyag da tuh tap-on di luta ya pakatbalon bo peman di tatagu dida te kadangyan da, 19mu ahida metlaing matet eda mid-um hanadah aammod dan tapottapol ta nangamung di kad-an da. 20Makudang di nomnom di tagu hin adina maawatan an adi ihwang di kinadangyan di tagu, mu ahi mate metlaing an umat hi aggayam.